رەسەيدە جاپپاي توبەلەسكەن 11 وزبەكستاندىق قاماۋعا الىندى
استانا. KAZINFORM - رەسەيدىڭ امۋر وبلىسى سۆوبودنىي قالاسىنداعى مەكتەپ ستاديونىندا جاپپاي توبەلەس ۇيىمداستىرعان وزبەكستاننىڭ 11 ازاماتى سوت شەشىمىمەن قاماۋعا الىندى، دەپ حابارلايدى وبلىستىق سوتتىڭ باسپا ءسوز قىزمەتى.
ولارعا بۇزاقىلىق جاسادى دەگەن ايىپ تاعىلدى (رەسەي اكىمشىلىك جاۋاپكەرشىلىك كودەكسىنىڭ 20.1-بابىنىڭ 1-بولىگى) . سوت بارلىعىن كىنالى دەپ تاۋىپ، 12-14 تاۋلىككە اكىمشىلىك قاماۋعا الۋ تۋرالى ۇكىم شىعاردى.
ميگرانتتاردى 25-مامىردا سۆوبودنىيداعى مەكتەپ ستاديونىندا فۋتبول ماتچى كەزىندە تۋىنداعان توبەلەس ءۇشىن پوليسيا قىزمەتكەرلەرى ۇستادى. ءبىر ادامعا مەديتسينالىق كومەك قاجەت بولدى.
بۇل رەتتە پوليسيا دەنەگە ورتاشا اۋىرلىقتاعى زيان كەلتىرۋ فاكتىسى بويىنشا (ر ف قىلمىستىق كودەكسىنىڭ 112-بابى، 1-بولىگى) قىلمىستىق ءىس قوزعادى.
- كىنالى دەپ تانىلعاندار 3 جىلعا دەيىن باس بوستاندىعىنان ايىرىلۋى مۇمكىن. سونداي-اق ولارعا رەسەيگە كىرۋگە تىيىم سالىنادى، - دەپ حابارلادى امۋر وبلىسى بويىنشا تەرگەۋ كوميتەتى.
