رەسەي، وزبەكستان، قىتاي جانە ەۋروپادان تاريحي مۇرالار قايتارىلادى - مينيستر
استانا. KAZINFORM - رەسەي، وزبەكستان، قىتاي جانە ەۋروپانىڭ ءبىرقاتار ەلىنەن تاريحي قۇندى مۇرالاردى قايتارۋ جۇمىستارى باستالدى. بۇل تۋرالى ق ر مادەنيەت جانە اقپارات ءمينيسترى ايدا بالايەۆا ايتىپ بەردى.
«ءبىز مادەني نىساندارىمىزدىڭ جاي-كۇيىن بارىنشا جوندەپ، لايىقتى دەڭگەيگە شىعارۋىمىز كەرەك. بۇل جۇمىس كەزەڭ-كەزەڭىمەن جاسالادى. قازىرگە دەيىن ەلىمىزدەگى 3 مۋزەيدىڭ عيماراتىمەن قاتار ىشكى ەكسپوزيتسياسىن زامان تالابىنا سايكەس مودەرنيزاتسيالاۋ كوزدەلگەن. ۇلتتىق مۋزەي جانىنان ۇلتىمىزدىڭ سان عاسىرلىق تاريحىنان سىر شەرتەتىن قۇندىلىقتارىمىزدىڭ ومىرشەڭدىگىن ساقتاپ قالۋعا جاعداي جاسايتىن اۋقىمدى رەستاۆراتسيا ورتالىعى قۇرىلادى. ويتكەنى، بۇل تاريحي مۇرالاردى قالپىنا كەلتىرۋ، قورعاۋ، ناسيحاتتاۋ ءۇشىن ماڭىزدى»، - دەدى ا. بالايەۆا قازمەديا ورتالىعىندا مينيسترلىكتىڭ القا وتىرىسىندا.
سونىمەن بىرگە ولاردىڭ ىشكى مازمۇنىن بايىتۋعا ەرەكشە كوڭىل بولىنەدى.
«سوندىقتان الىس-جاقىن شەتەلدەردەگى ءبىزدىڭ تاريحي قۇندى مۇرالارىمىزدى قايتارۋ مينيسترلىكتىڭ باستى نازارىندا بولماق. كەزىندە ءتۇرلى تاريحي جاعدايلارمەن شەتەل اسقان ۇلتتىق بايلىعىمىزدى وتانعا ورالتۋ باسىم باعىت بولىپ قالا بەرەدى. ارينە، بۇل جۇمىستار حالىقارالىق زاڭناماعا سايكەس جۇرگىزىلەدى، ايتسە دە ءبىز بۇگىندە رەسەي، وزبەكستان، قىتاي جانە ەۋروپانىڭ ءبىرقاتار ەلىمەن ءتيىستى جۇمىستاردى باستاپ كەتتىك»، - دەدى مينيستر.
