رەسەي: ورسك قالاسىنداعى ەلشانكا وزەنى تاسىپ جاتىر
استانا. KAZINFORM - ورىنبور وبلىسىنىڭ ورسك قالاسىندا ەلشانكا وزەنى ارناسىنان استى. بۇل تۋرالى قالا مەرى ۆاسيلي كوزۋپيتسا ءوزىنىڭ Telegram ارناسىندا حابارلادى، دەپ جازدى ت ا س س اقپارات اگەنتتىگى.
«قالانىڭ شورس كوشەسىنىڭ اۋدانىنداعى ەلشانكا وزەنى ارناسىنان اسىپ جاتىر. سۋ رابوچي كەنتى جاعىنان كەلىپ، وزەن ارناسىنىڭ ەكىنشى ۋچاسكەسىنىڭ اۋماعىنا كىردى»، - دەپ جازدى ول.
قالا باسشىسى لەنينسكي اۋدانىنىڭ باسشىسى ەلەنا كوليادينامەن بىرگە ۆاسنەتسوۆ جانە ۆيازەمسكايا كوشەلەرىن ارالاپ كوردى.
«№6 مەكتەپتىڭ اينالاسىندا سۋ بار. ۆيازەمسكايا كوشەسىنەن كراماتورسكاياعا دەيىن جانە مەحانيكالىق زاۋىتقا دەيىنگى اۋماقتى سۋ باستى»، - دەپ ناقتىلادى ول.
كوزۋپيتسانىڭ قوسىپ وتۋىنشە، بيلىك قازىر ادامدارعا حابارلاندىرۋ ايتىپ، پوليتسيا مەن توتەنشە جاعدايلاردى جويۋ كۇشتەرىمەن بىرگە جاعدايدى پىسىقتاپ جاتىر.
«ءبىز ەۆاكۋاتسيالىق اۆتوبۋستار مەن ۋاقىتشا ورنالاستىرۋ ورتالىقتارىن ۇيىمداستىردىق»، - دەپ ءتۇسىندىردى ول.
قالا باسشىسىنىڭ ايتۋىنشا، ستانيسلاۆسكي كوشەسىندە ەۆاكۋاتسيالىق بەكەت اشىلدى. اۋدان باسشىلىعى پوليتسيامەن بىرگە وندا تاۋلىك بويى كەزەكشىلىك جۇرگىزىپ جاتىر.
