رەسمي تابىسى جوق، ءبىراق قىمبات مۇلكى بارلار سالىق ورگاندارىنىڭ باقىلاۋىنا ىلىنە مە؟
استانا. KAZINFORM - قازاقستاندا ازاماتتار مەن زاڭدى تۇلعالاردىڭ سيفرلىق بەيىندەرى قالىپتاستىرىلعان. قارجى مينيسترلىگى Smart Data Finance جۇيەسى ارقىلى سالىقتىق دەرەكتەردى تالداپ، سايكەسسىزدىكتەردى انىقتاۋ باعىتىندا جۇمىس ىستەپ جاتىر.
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قارجى ۆيتسە-ءمينيسترى اسەت تۇرىسوۆ مالىمدەدى.
ۆيتسە-ءمينيستردىڭ ايتۋىنشا، Smart Data Finance جۇيەسى ەكى جىلدان بەرى جۇمىس ىستەپ كەلەدى. ونىڭ اياسىندا جەكە جانە زاڭدى تۇلعالاردىڭ سيفرلىق بەيىندەرى جاسالعان. بۇعان دەيىن كولىك قۇرالدارى مەن جىلجىمايتىن مۇلىككە قاتىستى دەرەكتەر تەكسەرىلىپ، قاجەت بولعان جاعدايدا زاڭنامادا بەلگىلەنگەن تارتىپپەن ءتيىستى جۇمىستار جۇرگىزىلگەن.
ءبىز بۇل باعىتتا شامامەن ءبىر جارىم جىلدان بەرى جۇمىس ىستەپ كەلەمىز. سالىقتىق ەسەپتىلىكتى تاپسىرۋ مەرزىمدەرى مەن جىلدىق سيكلدەر بار. اقپارات بەلگىلەنگەن ادىستەمە مەن سالىق كودەكسىنە سايكەس ءار سيكل سايىن قايتا تەكسەرىلىپ، ءاربىر بيزنەسپەن ءتيىستى جۇمىس جۇرگىزىلەدى، - دەدى اسەت تۇرىسوۆ.
جۋرناليستەر ازاماتتاردىڭ تابىسى مەن شىعىسى قازىردىڭ وزىندە تۇراقتى تەكسەرىلىپ جاتقان-جاتپاعانىن جانە تابىس كوزىن راستاي الماعان جاعدايدا قانداي شارالار قولدانىلاتىنىن سۇرادى.
ۆيتسە-ءمينيستردىڭ تۇسىندىرۋىنشە، ەگەر ازاماتتىڭ مۇلكى مەن ساتىپ العان دۇنيەلەرىنىڭ قۇنى ونىڭ رەسمي تابىسىمەن سايكەس كەلمەسە، سالىق ورگاندارىندا قوسىمشا سۇراقتار تۋىنداۋى مۇمكىن. مىسالى، ادامنىڭ سوڭعى 2-3 جىلدا بىرنەشە ءۇي نەمەسە 5-6 اۆتوكولىك ساتىپ العانى انىقتالىپ، ءبىراق ونىڭ رەسمي تابىس كوزى بولماسا، بۇل جاعداي قوسىمشا تەكسەرۋدى قاجەت ەتۋى ىقتيمال.
مۇنداي جاعدايلاردا ءتيىستى شارالار سالىق كودەكسىنە سايكەس قولدانىلادى. سالىق ورگاندارىنىڭ جەكە جانە زاڭدى تۇلعالاردان مالىمەتتەر سۇراتۋىنا مۇمكىندىك بەرەتىن ءتارتىپ بۇرىننان بار. مەنىڭ بىلۋىمشە، بۇل ءتارتىپ وزگەرمەيدى، - دەدى ول.
سونىمەن قاتار اسەت تۇرىسوۆتىڭ سوزىنشە، ۇلكەن دەرەكتەردى (Big Data) پايدالانۋ ازاماتتارعا سالىقتىق مىندەتتەمەلەردى تۇسىندىرۋگە جانە دەكلاراتسيا تولتىرۋ كەزىندە قولدا بار اقپاراتتى قولدانۋعا مۇمكىندىك بەرەدى. ماسەلەن، جۇيە ازاماتقا دەكلاراتسيادا قانداي دەرەكتەردى كورسەتۋگە بولاتىنىن نەمەسە ەسەپتەلگەن سالىق سوماسىنىڭ قالاي قالىپتاسقانىن تۇسىندىرۋگە كومەكتەسەدى.
ال ازامات تابىس كوزىن راستاي الماعان جاعدايدا قولدانىلاتىن ناقتى شارالار تۋرالى ۆيتسە-مينيستر ەگجەي-تەگجەيلى جاۋاپ بەرە المادى. ونىڭ ايتۋىنشا، بۇل ماسەلەگە قاتىستى تولىق تۇسىنىكتەمەنى مەملەكەتتىك كىرىستەر كوميتەتىنىڭ وكىلدەرى بەرە الادى.
ايتا كەتەيىك، بۇعان دەيىن قازاقستاندا 339 ميلليارد تەڭگەگە جۋىق سيفرلىق تەڭگە اينالىمعا شىعارىلعانى حابارلاندى.
