رەسەيگە سالىنعان سانكتسيالار قازاقستاننىڭ بيداي ەكسپورتىنا قالاي اسەر ەتەدى
استانا. KAZINFORM - پرەمەر-ءمينيستردىڭ ورىنباسارى سەرىك جۇمانعارين رەسەيگە سالىنعان سوڭعى سانكتسيالار قازاقستاننىڭ استىق ەكسپورتىنا كەرى اسەر ەتە مە دەپ الاڭدايتىنىن ايتتى.

«شىن مانىندە بۇل ءبىزدى وتە قاتتى جاناپ ءوتىپ جاتىر. مۇنىڭ كەسىرىنەن كوپتەگەن لوگيستيكالىق، ساۋدا تىزبەكتەرى ءۇزىلىپ قالدى. ءبىز سانكتسيا سالۋشى كواليتسيانىڭ مۇشەسى ەمەسپىز جانە وسى ءبىرجاقتى سانكتسيالىق ساياساتتى قولدامايمىز. ءبىراق ول سانكتسيانى ساقتايمىز. ويتكەنى ول بىزگە ەكونوميكالىق تۇرعىدان ءتيىمدى. ءبىزدىڭ ەكونوميكامىز سونشالىق ۇلكەن ەمەس. سايكەسىنشە سانكتسيا تۇسسە، قىسىمىن كوتەرە المايمىز. ءبىزدىڭ كاسىپورىندار ءبىرىنشى كەزەكتە كوتەرە المايدى. سوندىقتان ءبىز ۇنەمى ديالوگ قۇرىپ كەلەمىز. ا ق ش- پەن، ەۋروپالىق وداقپەن جۇمىس ىستەيتىن وكىلدىكتەر بار. مەن وسى جۇمىستى قازاقستاننىڭ ىشىندە ۆيتسە- پرەمەر رەتىندە باسقارامىن»، - دەدى ول ءماجىلىستىڭ جالپى وتىرىسىنان كەيىن ب ا ق وكىلدەرىنە بەرگەن سۇحباتىندا.
ۆيتسە- پرەمەر رەسەي استىعىنا قويىلعان شەكتەۋلەردىڭ قازاقستانعا اسەرى زەردەلەنىپ جاتقانىن ايتادى.
«سانكتسيا ساياساتى اسەر ەتەتىن سالالار سوڭعى قابىلدانعان پاكەتتەردە كورىنىس تاپقان. ايتارلىقتاي الۋان ءتۇرلى دەۋگە بولادى. ازىرگە ول سانكتسيالار ناقتى ازىق- تۇلىك ونىمدەرىن قامتىعان جوق. ءبىراق ەۋرووداق رەسەي مەن بەلارۋس بيدايىنا ەكسپورت باجىن سالعانىن بىلەسىزدەر. بۇل ايتارلىقتاي سالماقتى ارگۋمەنت. ياعني، وسى شەكتەۋلەر قانداي دا ءبىر جولمەن ءبىزدى دە جاناپ كەتپەي مە، سونى انىقتاپ الۋ قاجەت. ويتكەنى ءبىز ەۋرووداققا ايتارلىقتاي كوپ بيداي ەكسپورتتايمىز»، - دەدى سەرىك جۇمانعارين.