رەسەي قازاقستانعا جاسىمىقتى ءوز اۋماعى ارقىلى ەكسپورتتاۋعا قايتا رۇقسات بەردى
استانا. KAZINFORM - پرەمەر-مينيستر ولجاس بەكتەنوۆ ءماجىلىس دەپۋتاتتارىنىڭ ساۋالىنا بەرگەن جاۋاپتا رەسەي فەدەراتسياسى ەكى اراداعى كەلىسسوزدەردەن كەيىن قازاقستاندىق جاسىمىقتىڭ نوۆوروسسيسك تەڭىز ساۋدا پورتى ارقىلى ەكسپورتتالۋىنا رۇقسات ەتكەنىن ايتتى.
«21-قازاندا اۋىل شارۋاشىلىعى مينيسترلىگى رەسەي فەدەراتسياسى تاراپىنان ۋاقىتشا شەكتەۋلەردىڭ ەنگىزىلۋى جونىندەگى ماسەلەلەردى تالقىلاۋ ءۇشىن روسسەلحوزنادزور اتىنا ەكىجاقتى كەڭەس وتكىزۋ تۋرالى رەسمي حات جىبەردى. 1-قاراشادا تاراپتار اراسىندا روسسەلحوزنادزوردىڭ وسىمدىك شارۋاشىلىعى ونىمدەرىنىڭ ترانزيتىن كىدىرتۋ فاكتىلەرى بويىنشا ونلاين-كەڭەس ءوتتى. پىسىقتاۋ بارىسىندا 16 مىڭ توننا كولەمىندەگى قازاقستاندىق جاسىمىقتىڭ پارتياسى «نوۆوروسسيسك تەڭىز ساۋدا پورتى» جابىق اكسيونەرلىك قوعامى تەڭىز پورتىندا كەمەگە ءساتتى تيەلىپ، مەجەلى جەرگە جىبەرىلدى. كەزدەسۋ قورىتىندىسى بويىنشا ەيسك قالاسىنىڭ تەڭىز پورتى اۋماعىندا قازاقستاندىق جاسىمىق پارتياسىنىڭ ۇلگىلەرىن ىرىكتەپ، زەرتحانالىق ساراپتاما جۇرگىزۋ ءۇشىن بىرلەسكەن جۇمىس توبىن ۇيىمداستىرۋ جونىندەگى ۋاعدالاستىققا دا قول جەتكىزىلدى»، - دەلىنگەن جاۋاپتا.
سونداي-اق، ۇكىمەت باسشىسى قازاقستان ۇكىمەتى مۇنداي شەكتەۋلەرگە قارىمتا شارالار قابىلداپ جاتقانىن ەسكە سالادى.
«بۇعان دەيىن ىشكى نارىقتى قورعاۋ ماقساتىندا قازاقستان ءۇشىنشى ەلدەردەن جانە ەۋرازيالىق ەكونوميكالىق وداق ەلدەرىنەن بيداي يمپورتىنا 2024-جىلدىڭ سوڭىنا دەيىن تىيىم سالۋ ەنگىزگەنىن اتاپ ءوتۋ قاجەت. بۇل رەسەي استىعىنىڭ وزبەكستان رەسپۋبليكاسىنا جانە قىتاي حالىق رەسپۋبليكاسىنا قايتا ەكسپورتىن شەكتەگەن بولاتىن»، - دەپ جازادى ولجاس بەكتەنوۆ.
پرەمەر-مينيستر قازاقستاندىق ەكسپورتتاۋشىلار ءوز قۇقىقتارىن ەۋرازيالىق ەكونوميكالىق وداق سوتىنا جۇگىنۋ ارقىلى دا قورعاي الاتىنىن ايتادى.
«روسسەلحوزنادزوردىڭ ارەكەتتەرىنە قازاقستاندىق ەكسپورتتاۋشىلار رەسەي فەدەراتسياسىنىڭ زاڭناماسىنا سايكەس ءوز بەتىنشە شاعىمدانۋعا قۇقىلى ەكەنىن اتاپ وتكەن ءجون. بۇدان باسقا، شيكىزاتتىق ەمەس تاۋارلاردى قازاقستاندىق ەكسپورتتاۋشىلار ءۇشىن ساقتاندىرۋدى، ونىڭ ىشىندە شىعىندارىن ساقتاندىرۋدى «ساراپتامالىق-كرەديتتىك اگەنتتىك» ا ق ۇسىنادى»، - دەلىنگەن رەسمي جاۋاپتا.
بۇعان دەيىن رەسەي ەۋروپالىق وداقتان قازاقستانعا جونەلتىلگەن 408 سيىردى كەرى قايتارعانىن جازعان ەدىك.
