رەسەي قالالارىندا قازاقستان مەكتەپتەرى اشىلادى دەپ سەنەمىز - قاسىم- جومارت توقايەۆ

استانا. KAZINFORM - قازاقستان مەن رەسەي اراسىنداعى مادەني- گۋمانيتارلىق بايلانىس قارقىندى دامىپ كەلەدى. بۇل تۋرالى قازاقستان پرەزيدەنتى قاسىم- جومارت توقايەۆ رەسەيدە شىعاتىن «يزۆەستيا» گازەتىنە جاريالانعان ماقالاسىندا جازدى.

«ەلدەرىمىز ۇلى جەڭىستىڭ 80  جىلدىعىن لايىقتى اتاپ وتۋگە دايىندالىپ جاتىر. ورتاق تاريحقا دەگەن قۇرمەت ءاردايىم قازاقستان مەن رەسەي ىنتىماقتاستىعىنا ارقاۋ بولارى ءسوزسىز. ⅩⅩ عاسىردا ءبىزدىڭ حالىقتارىمىز ادامزات تاريحىنداعى ەڭ سۇراپىل سوعىستا فاشيزمدى جەڭىپ، اۋىر سىناقتى بىرگە ەڭسەردى. قازاقستاندىقتار قان مايداندا جان اياماي سوعىستى. قازاقستان ارميانى كەرەك- جاراقپەن جانە ازىق- تۇلىكپەن قامتاماسىز ەتىپ، سەنىمدى ستراتەگيالىق تىل بولدى. ەۆاكۋاتسيا كەزىندە جۇزدەگەن مىڭ وتباسى قازاق جەرىنەن پانا تاپتى. «ەشكىم دە، ەشتەڭە دە ۇمىتىلمايدى» دەگەن ءسوز قازاقستاندىقتار ءۇشىن جالاڭ ۇران ەمەس. بۇل ۇعىم مايدانگەرلەر مەن تىل ەڭبەككەرلەرىنىڭ قايتالانباس ەرلىگى ەل جادىندا ماڭگى ساقتالاتىنىن بىلدىرەدى»، - دەپ اتاپ وتەدى مەملەكەت باسشىسى.

پرەزيدەنتتىڭ اتاپ وتۋىنشە، ەكى ەل اراسىنداعى مادەني- گۋمانيتارلىق بايلانىس تا قارقىندى دامىپ كەلەدى. كوپشىلىك كوڭىلىنەن شىعاتىن مادەنيەت كۇندەرى، فەستيۆالدەر مەن كورمەلەر تۇراقتى وتكىزىلىپ تۇرادى.

«بىلتىر ەلىمىزدە «ورىس ماۋسىمى» دەگەن اتاۋمەن اۋقىمدى ءىس- شارالار ۇيىمداستىرىلدى. ال بيىل ماسكەۋدە استانانىڭ مادەنيەت كۇندەرى ءوتتى. ونداعى ەڭ نەگىزگى وقيعا رەتىندە «اباي» وپەراسىنىڭ ۇلكەن تەاتردا قويىلعانىن ايتۋعا بولادى. سونداي- اق، رەسەيدىڭ باستى مۇراجايلارى - ترەتياكوۆ گالەرەياسىندا جانە ەرميتاجدا قازاقستاننىڭ كورمەسى اشىلادى»، - دەدى قاسىم- جومارت توقايەۆ.

مەملەكەت باسشىسى قازاقستان كومانداسى رەسەيدىڭ قازان قالاسىندا وتكەن «بولاشاق ويىندارىنا» قاتىسقانىنا نازار اۋدارتادى.

«ال، استاناداعى دۇنيەجۇزىلىك كوشپەندىلەر ويىندارىندا رەسەي سپورتشىلارى ونەر كورسەتتى. بۇل - مادەني- گۋمانيتارلىق قارىم- قاتىناستى جاڭا فورماتتا ءوربىتۋ ماڭىزدى ەكەنىنىڭ بەلگىسى. ءبىز وسى يگى ءداستۇردى جالعاستىرىپ، رەسەي باستاماسىمەن قولعا الىنعان „بولاشاق ويىندارىنىڭ“ كەزەكتى سايىسىن 2026 -جىلى قازاقستاندا وتكىزەمىز. ءبىلىم سالاسىنداعى ىنتىماقتاستىقتىڭ دا مازمۇنى تولىعا ءتۇستى. ءبىز ەلىمىزدىڭ وڭتۇستىك ايماقتارىندا رەسەي مەكتەپتەرىن اشۋدى جوسپارلاپ وتىرمىز. سول سياقتى بىزبەن ىرگەلەس جاتقان رەسەي قالالارىندا قازاقستان مەكتەپتەرى اشىلادى دەپ سەنەمىز»، - دەدى پرەزيدەنت.

ەسكە سالا كەتەيىك، بۇعان دەيىن پرەزيدەنتتىڭ شاقىرۋىمەن ۆلاديمير پۋتين قازاقستانعا مەملەكەتتىك ساپارمەن كەلەتىنىن جازعان بولاتىنبىز.

اۆتور
مارلان جيەمباي