رەسەي مۇنايىن قىتايعا قازاقستان ارقىلى تاسىمالداۋعا قاتىستى وزگەرىستەر ەنگىزىلدى
استانا. KAZINFORM - سەنات رەسەي مۇنايىن قازاقستان اۋماعى ارقىلى قىتايعا تاسىمالداۋدى رەتتەيتىن ۇكىمەتارالىق كەلىسىم تۋرالى زاڭدى ماقۇلدادى.
قۇجاتتى ارىپتەستەرىنە سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ ءتوراعاسى سۇيىندىك الداشيەۆ تانىستىردى.
«اتالعان حاتتاماعا سايكەس رەسەي مۇنايىن قازاقستان رەسپۋبليكاسىنىڭ اۋماعى ارقىلى قىتاي حالىق رەسپۋبليكاسىنا تاسىمالداۋ جونىندەگى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى 2013 -جىلعى جاسالعان كەلىسىمنىڭ قولدانۋ مەرزىمىن 2034 -جىلعا دەيىن ۇزارتۋ جانە دە مۇناي ءترانزيتىنىڭ كولەمىن، تاريفتى وزەكتەندىرۋ ماسەلەلەرىنە قاتىستى كەلىسىمگە وزگەرىستەر ەنگىزۋ كوزدەلەدى.
2023 -جىلدىڭ اقپانىندا رەسەي تاراپى (روسنەفت) 10 جىلدىق كەزەڭگە 100 ميلليون توننا جەتكىزۋ تۋرالى قىتاي تاراپىمەن (س پ ن س) كەلىسىمىن ۇزارتىپ، قول قويدى. وسىعان بايلانىستى، 2023 -جىلدىڭ ماۋسىمىندا سانكت-پەتەربۋرگ قالاسىندا قازاقستان رەسپۋبليكاسى مەن رەسەي فەدەراتسياسى ەكىجاقتى كەلىسىمگە وزگەرىستەر ەنگىزۋ تۋرالى حاتتاماعا قول قويىلدى. حاتتامادا مۇناي ترانزيتىنىڭ كولەمىن جانە ءتاريفتى وزەكتەندىرۋ ماسەلەلەرىنە قاتىستى كەلىسىمگە وزگەرىستەر ەنگىزۋ كوزدەلەدى»، - دەدى دەپۋتات.
ول وزگەرىستەردىڭ نەگىزلەرى تومەندەگىدەي:
1. تاسىمالداناتىن مۇناي كولەمى جىلىنا 7 ميلليون توننادان، 10 ميلليون تونناعا دەيىن وسەدى.
2. ءتۇيمازى - ومسك - نوۆوسيبيرسك مۇناي قۇبىرىنىڭ قازاقستاندىق ۋچاسكەسىندە مۇناي تاسىمالداۋ تاريفى 2,1 دوللار بولىپ بەلگىلەندى.
3. قازاقستان اۋماعى بويىنشا تاسىمالداناتىن مۇناي تاريفى تونناسىنا 15 دوللار قۇرايدى.
4. كەلىسىمنىڭ قولدانىلۋ مەرزىمى 2034 -جىلعى 1-قاڭتارعا دەيىن ۇزارتىلادى.
5. قازاقستان تاراپى مۇناي تاسىمالداۋ جونىندەگى كورسەتىلەتىن قىزمەتتەرگە نولدىك مولشەرلەمە بويىنشا قوسىلعان قۇن سالىعىن سالادى.
«بۇل رەتتە قازاقستان تاراپى قازاقستان رەسپۋبليكاسىنىڭ سالىق زاڭناماسىنا سايكەس قوسىلعان قۇن سالىعىن قايتارۋ ماقساتى ءۇشىن مۇنايدى تاسىمالداۋ باعىتى بويىنشا تاسىمالداۋ جونىندەگى كورسەتىلەتىن قىزمەتتەردى حالىقارالىق تاسىمال رەتىندە قاراستىرادى»، - دەدى سۇيىندىك الداشيەۆ.
سەنات دەپۋتاتتارى زاڭدى ماقۇلداۋ تۋرالى شەشىم قابىلدادى.
اۆتور
مارلان جيەمباي
