رەسەي مەن يران ستراتەگيالىق سەرىكتەستىك تۋرالى كەلىسىمگە قول قويدى

استانا. KAZINFORM - رەسەي مەن يران قورعانىس، لاڭكەستىكپەن كۇرەس، ەنەرگەتيكا، قارجى، كولىك، ونەركاسىپ، اۋىل شارۋاشىلىعى، مادەنيەت، عىلىم جانە تەحنولوگيا سياقتى كوپتەگەن سالانى قامتيتىن كەلىسىمگە قول قويدى.

Russia, Iran
Photo credit: kremlin.ru

17-قاڭتاردا يران يسلام رەسپۋبليكاسىنىڭ پرەزيدەنتى ماسۋد پەزەشكياننىڭ رەسەيگە رەسمي ساپارى باستالدى.

ەكى ەلدىڭ كوشباسشىلارى ۆلاديمير پۋتين مەن ماحمۋد پەزەشكيان كەلىسسوزدەر جۇرگىزىپ، ونىڭ بارىسىندا تاياۋ شىعىستاعى احۋال، ونىڭ ىشىندە سيرياداعى جانە پالەستينالىق-يزرايلدىك قاقتىعىس، زاكاۆكازەدەگى، يراننىڭ يادرولىق باعدارلاماسى توڭىرەگىندەگى جاعداي، سونداي-اق، ەكىجاقتى ىنتىماقتاستىقتى كەڭەيتۋ ماسەلەلەرىن تالقىلادى.

كەلىسسوزدەر ناتيجەسىندە پرەزيدەنتتەر رەسەي مەن يران اراسىنداعى جان-جاقتى ستراتەگيالىق ارىپتەستىك تۋرالى كەلىسىمگە قول قويدى.

ساپار بارىسىندا يران پرەزيدەنتى رەسەي پرەمەر-ءمينيسترى ميحايل ميشۋستينمەن دە كەلىسسوزدەر جۇرگىزدى. كەزدەسۋ بارىسىندا ەكىجاقتى ىنتىماقتاستىقتىڭ ءتۇرلى ماسەلەلەرى تالقىلاندى.

ساراپشىلاردىڭ پىكىرىنشە، كەلىسىمگە قول قويۋ رەسەي-يران قارىم-قاتىناسىنداعى ماڭىزدى وقيعا.

تاياۋ شىعىستى زەرتتەۋ ورتالىعىنىڭ ساراپشىسى، ساياساتتانۋشى فارحاد يبراگيموۆ قازىرگى ۋاقىتتا رەسەي-يران قارىم-قاتىناسى سوڭعى بىرنەشە جىلدا وتە بەلسەندى تۇردە دامىپ كەلەدى دەپ سانايدى. بۇل كەلىسىمنىڭ نەگىزىن قالاۋشىلاردىڭ ءبىرى، يراننىڭ بۇرىنعى پرەزيدەنتى يبراحيم رايسي يسلام رەسپۋبليكاسى رەسەي جانە قىتاي، ورتالىق ازيا، وڭتۇستىك كاۆكاز جانە تۇركيا ەلدەرىمەن قارىم-قاتىناسىن كەڭەيتۋى قاجەت دەپ مالىمدەگەن.

- بۇل كەلىسىمنىڭ ءمانى - رەسەي-يران قارىم-قاتىناسىنداعى جاعدايدى قاعاز جۇزىندە بەكىتۋ، - دەيدى ساراپشى.

ول سونداي-اق قازىر ەلدەردىڭ ستراتەگيالىق سەرىكتەس ەكەنىن، ال يران بۇل ءۇشىن ءبىرقاتار شارا قابىلداعانىن – ش ى ۇ مەن بريكسكە مۇشە بولعانىن اتاپ ءوتتى.

رەسەي عىلىم اكادەمياسىنىڭ شىعىس تانۋ ينستيتۋتىنىڭ عىلىمي قىزمەتكەرى الەكساندر ۆوروبيەۆ بۇل كەلىسىم جان-جاقتى سيپاتتا بولادى جانە رەسەي فەدەراتسياسى مەن يراننىڭ ءارتۇرلى سالالارداعى كوپجاقتى جانە ۇزاق مەرزىمدى ىنتىماقتاستىعىن نىعايتۋعا ارنالعان دەپ باعالادى.

ونىڭ پىكىرىنشە، وتكەن جىلى رەسەي مەن كحدر اراسىندا جاسالعان ۇقساس كەلىسىمنەن ايىرماشىلىعى، يرانمەن كەلىسىمدە قاتاڭ اسكەري-ساياسي سيپات بولمايدى.

- كوپ ۆەكتورلى ساياساتتى ۇستاناتىن يران ماسكەۋدى ەڭ الدىمەن نەگىزگى ساۋدا- ەكونوميكالىق جانە ەنەرگەتيكالىق سەرىكتەستەردىڭ ءبىرى رەتىندە قاراستىرادى، ونىمەن بايلانىستاردى نىعايتۋ يران ەكونوميكاسىنىڭ وسۋىنە جانە ساۋدا-ەكونوميكالىق سالانىڭ ودان ءارى كەڭەيۋىنە ىقپال ەتۋى ءتيىس. ماسكەۋمەن عانا ەمەس، سونىمەن قاتار رەسەيدىڭ ە ا ە و جانە ت م د- داعى كورشىلەرىمەن: مىسالى، بەلارۋس، قازاقستان جانە ازەربايجانمەن دە بايلانىستار نىعايا تۇسەدى، - دەپ اتاپ ءوتتى ا. ۆوروبيەۆ.

رەسەي عىلىم اكادەمياسىنىڭ قىزمەتكەرى كەلىسىم رەسەيدىڭ يرانمەن قارىم-قاتىناسىندا سوڭعى بىرنەشە جىلدا ورىن العان وزگەرىستەردى رەسىمدەيتىنىن اتاپ ءوتتى. بۇل «سولتۇستىك-وڭتۇستىك» ءدالىزىن دامىتۋ ارقىلى كولىك-لوگيستيكالىق كوممۋنيكاتسيالاردى نىعايتۋ جانە يراندا رەسەيلىك بيزنەستىڭ قاتىسۋىن كەڭەيتۋ جانە گۋمانيتارلىق بايلانىستار سانىن ارتتىرۋدى كوزدەيدى.

ماسكەۋ ءۇشىن يرانمەن بايلانىستاردى دامىتۋ وپپورتۋنيستىك ەمەس، ستراتەگيالىق بولىپ تابىلادى، ونى جۇزەگە اسىرىلىپ جاتقان جانە جوسپارلانعان جوبالار (كولىك ءدالىزى، ەنەرگەتيكالىق ىنتىماقتاستىق، ە ا ە و- مەن ەركىن ساۋدا تۋرالى كەلىسىم) دالەلدەيدى.

تاياۋ شىعىستى زەرتتەۋ ورتالىعىنىڭ (رەسەي) پرەزيدەنتى مۋراد ساديعزادە دە تاراپتار كوپجاقتى جانە ەكىجاقتى كۇن ءتارتىبىنىڭ ءارتۇرلى سالالارىنداعى بايلانىستارىن شىنىمەن دە نىعايتقانىن اتاپ ءوتتى. وسىعان بايلانىستى بۇل قۇجات ماسكەۋ مەن تەگەران اراسىنداعى قارىم-قاتىناستى نىعايتۋ جولىنداعى ءبىرقاتار ەكونوميكالىق جانە ساياسي كەدەرگىنى ازايتۋى كەرەك.

ول كوپتەگەن اسپەكتىلەردە ساۋدا- ەكونوميكالىق جانە گۋمانيتارلىق بايلانىستاردى كەڭەيتۋگە باستى نازار اۋدارىلاتىنىن، ءبىراق ەلدەر اراسىنداعى اسكەري-ساياسي ىنتىماقتاستىققا ەرەكشە كوڭىل ءبولىنۋى ابدەن مۇمكىن ەكەنىن، بۇل الەمدەگى جاعدايدىڭ شيەلەنىسۋىنە بايلانىستى وتە قيسىندى ەكەنىن اتاپ ءوتتى.

ايتا كەيتىك، بۇعان دەيىن يران مەن ەۋروپالىق وداقتىڭ ءۇش ەلى سانكسيالاردى جويۋ تۋرالى كەلىسسوز جۇرگىزگەنىن حابارلاعان بولاتىنبىز.

سوڭعى جاڭالىقتار