رەسەي مەن بەلارۋس تەحنيكاسىنا باسىمدىق بەرگەندى قويۋ كەرەك - فەرمەر فاريد ابيتايەۆ
«مايلى داقىلداردىڭ تاجىريبەلىك شارۋاشىلىعى» ج ش س باس ديرەكتورى فاريد ابيتايەۆ ماجىلىستە وتكەن كوميتەت وتىرىسىندا سالالىق ۆەدومستۆولاردىڭ اۋىل شارۋاشىلىعى تەحنيكاسىن جاڭارتۋ ساياساتىن سىنادى، دەپ حابارلايدى قازاقپارات ءتىلشىسى.

«بارىنەن بۇرىن ايتايىن دەگەنىم، ءبىز قازىر ءتۇرلى تەحنيكانى ەگىسكە سالىپ ءجۇرمىز. سونىڭ ىشىندە كەيىنگى ەكى جىلدا وتاندىق تەحنيكانى دا پايدالانىپ ءجۇرمىز. ودان بولەك «روستەلماش»، claاs تەحنيكالارى دا بار. بۇعان دەيىن باتىستىڭ باسقا دا وندىرىستەرى شىعارعان تەحنيكالاردى ساتىپ العانبىز. سوندىقتان قازاقستاندا بار تەحنيكالاردىڭ جۇمىسى، ساپاسى، باعاسى تۋرالى مالىمەتتىڭ بارىمەن تانىسپىز. قازىرگى وتاندىق وندىرۋشىلەردى قولداۋ ساياساتىن، ءسوز جوق، قولدايمىز. مەملەكەتتىڭ قولداۋ شارالارى مول دەپ ايتۋعا بولادى. ءتىپتى جەتكىلىكتى مولشەردەن ارتىق دەپ ەسەپتەيمىن. قوسىمشا قۇن سالىعىنان بوساتۋ، ۋتيلالىم، جەڭىلدەتىلگەن نەسيەلەر سياقتى اسا ماڭىزدى قولداۋ تەتىكتەرى بار. ءبىراق پرەزيدەنت تەحنيكانى جاڭارتۋ پايىزىن عانا كوتەرۋ كەرەك دەگەن جوق قوي. ول ەڭبەك ونىمدىلىگىن ارتتىرۋ جايىن دا ايتتى. بۇل كورسەتكىش بويىنشا ايتساق، قازىر رەسەي مەن بەلارۋستەن شىعاتىن تەحنيكا باتىس ءوندىرىسىنىڭ تەحنيكاسىنا ۇتىلىپ جاتىر»، - دەدى فاريد ابيتايەۆ.
ايتۋىنشا، گەوساياسي جاعدايلاردان كەيىن بۇل تەحنيكالار ەڭ سوڭعى زاماناۋي تەحنولوگيالاردان جۇرداي بولىپ شىعىپ جاتىر.
«روبوتتاندىرۋ جاعىنان دا، تسيفرلاندىرۋ جاعىنان دا ولار ارتتا قالىپ جاتىر. اۋىل شارۋاشىلىعىنداعى تسيفرلاندىرۋ ەڭبەك ونىمدىلىگىن 20 پايىز ارتتىرادى. بۇل جالپىعا ءمالىم جايت. رەسەي مەن بەلارۋس تەحنيكاسى قازىر وسى ارتىقشىلىقتان قاعىلعان. وسى سەبەپتەن دە مەن رەسەي، بەلارۋس تەحنيكاسىنا باسىمدىق بەرىپ قويۋ سونشالىق دۇرىس ەمەس دەپ ەسەپتەيمىن. قازىر ءبىزدىڭ باسىمىزداعى پروبلەمانىڭ ءبارى اقشانىڭ جەتپەۋىنەن بولىپ وتىر. بۇعان دەيىن تەحنيكاعا سالاتىن اقشانىڭ 25 پايىزىن شەتەلدىك ونىمگە سالساق، قازىر ونى 15 پايىزعا ازايتىپ وتىرمىز. ونىڭ سەبەبى اقشانىڭ جوقتىعىندا عانا. ءبىز ونىڭ ورنىن وتاندىق تەحنيكامەن جاپقان بولىپ جاتىرمىز. مىسالى، CLASS تەحنيكالارى «روسسەلماشتىڭ» تەحنيكالارىنان قىمبات. بۇلاي كەتە بەرسە، CLASS- قا دا اقشا تاپپاي قالامىز. بۇل دۇرىس ەمەس قوي»، - دەيدى كاسىپكەر.
سونداي-اق ول ماسەلەنىڭ سالدارىن ەمەس، سەبەبىن جويۋ كەرەكتىگىن ايتادى.
«سوندىقتان تەحنيكانى جاڭارتۋ تولىققاندى ءجۇرۋ ءۇشىن شارۋالاردىڭ تاڭداۋ ەركىندىگى بولۋ كەرەك. وتاندىق ساتىپ الا ما، شەتەلدىك تەحنيكا ساتىپ الا ما، ءوزى تاڭداۋى كەرەك. قازىرگى شەتەلدىك تەحنيكادا ەڭبەك ونىمدىلىگى مەن سيفرلاندىرۋعا قاجەت ەلەمەنتتىڭ ءبارى بار. ال رەسەي مەن بەلارۋس تەحنيكاسى ونداي ارتىقشىلىعىمەن ماقتانا المايدى. وسىعان بايلانىستى ماسەلەنى تۇبىرىمەن شەشىپ، اگرارلىق سالاعا بولىنەتىن قارجى كولەمىن ارتتىرۋ ءۇشىن كۇرەسۋدى ۇسىنامىن»، - دەدى فەرمەر.