رەسەي جانە قىتاي مارستى بىرلەسىپ زەرتتەيدى
ماسكەۋ. KAZINFORM - رەسەي مەن قىتاي مارستى زەرتتەۋگە ارنالعان بىرلەسكەن ميسسيا اياسىندا عىلىمي اسپاپتار مەن تەحنيكانى ازىرلەيدى. بۇل تۋرالى اگەنتتىكتىڭ ماسكەۋدەگى مەنشىكتى ءتىلشىسى حابارلايدى.
بۇل تۋرالى «روسكوسموس» مەملەكەتتىك كورپوراتسياسىنىڭ باس ديرەكتورى دميتري باكانوۆ مالىمدەدى.
- بىزدە «چانە-7» بىرلەسكەن اي ميسسياسى بار. سونداي-اق مارستى زەرتتەۋگە ارنالعان بىرلەسكەن ميسسيانى باستايمىز. ونىڭ اياسىندا عىلىمي اسپاپتار مەن تەحنيكا ازىرلەنەدى، - دەدى «روسكوسموس» باس ديرەكتورى دميتري باكانوۆ.
ونىڭ ايتۋىنشا، بۇل جوبا رەسەي مەن قىتايدىڭ عارىش سالاسىنداعى ىنتىماقتاستىعىنىڭ نەگىزگى باعىتتارىنىڭ ءبىرى بولادى.
رەسەي مەن قىتاي عارىش سالاسىندا ءبىرقاتار ءىرى جوبانى بىرلەسىپ جۇزەگە اسىرىپ كەلەدى. ىنتىماقتاستىقتىڭ باسىم باعىتتارىنىڭ ءبىرى - حالىقارالىق عىلىمي اي ستانسياسى (ح ع ا س) جوباسى. وعان 16 ەل مەن ەكى حالىقارالىق ۇيىم قاتىسادى.
بۇعان دەيىن قىتايدىڭ اۋقىمدى عارىشتىق ميسسيالاردى جۇزەگە اسىرۋدى جوسپارلاپ وتىرعانىن حابارلانعانبىز.
سونداي-اق قىتايلىق عالىمدار مارس جاعدايىندا تىرشىلىك ەتە الاتىن وسىمدىك ءتۇرىن تاپقانى تۋرالى جازعان ەدىك.
