رەسەي شەكاراسىندا جۇك كولىكتەرى كەپتەلىستە تۇر - مەملەكەتتىك كىرىستەر كوميتەتى

استانا. KAZINFORM - مەملەكەتتىك كىرىستەر كوميتەتى 13- جەلتوقسانعا قاراعان تۇننەن باستاپ «سىرىم» اۆتكولىك وتكىزۋ پۋنكتىندە رەسەي فەدەراتسياسىنا قاراي 450-500 جۋىق جۇك كولىگىنىڭ جينالىپ قالعانىن حابارلادى.

باتىس قازاقستان وبلىسى مەن رەسەي فەدەراتسياسىنىڭ سامارا وبلىسى اۋماعىندا اۋا- رايى ناشارلاپ، قالىڭ قار ءتۇسىپ، بوران سوعىپ، كوكتايعاققا بايلانىستى جۇك كولىكتەرى 12- جەلتوقساننان باستاپ وتە الماي، تۇرىپ قالعان.

- رەسەي فەدەراتسياسىنداعى فەدەرالدى تراسسالار بويىنشا قوزعالىس ۋاقىتشا شەكتەلدى، رەسەي ت ج م مالىمەتى بويىنشا شەكتەۋلەر شامامەن 13 - جەلتوقسان ساعات 22:00 گە دەيىن قولدانىلادى، - دەلىنگەن حابارلامادا.

وسى جاعدايلارعا بايلانىستى، جۇك كولىكتەرىنىڭ قوزعالۋعا مۇمكىندىگى جوق جانە ولار اۋا-رايىنىڭ جاقسارۋىن كۇتىپ جاتىر.

اتالعان جاعداي بويىنشا جۇرگىزۋشىلەرگە تۇسىندىرمە جۇمىستار جۇرگىزىلىپ، كەمپينگتەردە اۋا- رايى جاقسارعانشا كۇتىپ، باسقا وبلىستارداعى جاقىن ماڭداعى وتكىزۋ پۋنكتتەرى ارقىلى مارشرۋت قۇرۋ ۇسىنىلدى.