رەسەي بيدايىن جالعان قۇجاتتارمەن ەكسپورتتاپ كەلگەندەر ۇستالدى

پەتروپاۆل. KAZINFORM - قارجى مونيتورينگى اگەنتتىگىنىڭ سولتۇستىك قازاقستان وبلىسى بويىنشا ەكونوميكالىق تەرگەپ- تەكسەرۋ دەپارتامەنتى وتكەن جارتى جىلدىقتى قورىتىندىلادى.

ۆەدومستۆو باسشىسى باقىتجان ابۋلحايروۆتىڭ ايتۋىنشا، جەر قويناۋىن زاڭسىز پايدالانعانى ءۇشىن 4 تۇلعاعا قاتىستى قىلمىستىق ءىس سوتقا جولداندى. ايىپتالۋشىلاردان جالپى سوماسى 3,7 ميلليارد تەڭگەنىڭ مۇلكى تاركىلەندى. تەرگەۋ بارىسىندا ولاردىڭ اۋىل شارۋاشىلىعى جەرلەرىن زاڭسىز كەن وندىرۋگە پايدالانعانى انىقتالىپ، ءتيىستى شارالار قابىلداندى. اۋىل شارۋاشىلىعى جەرى مەملەكەت مەنشىگىنە قايتارىلادى. ال كەن ورنىن يگەرۋ جانە جاقسارتۋعا جاڭا ينۆەستورلار تارتىلدى.

«اۋىل شارۋاشىلىعى سالاسىن تالداۋ كەزىندە مۇندا دا زاڭبۇزۋشىلىقتار انىقتالدى. وڭىردە ەش جەردە تىركەلمەيتىن زاڭسىز استىق يمپورتى بار. كەشەندى تالداۋ ناتيجەسىندە وبلىستىڭ ورتاشا جىلدىق بيداي ەكسپورتى كولەمى 1,5 ميلليون توننا ەكەنى انىقتالدى. ءبىر توپ ادام رەسەيلىك استىققا جالعان شوت- فاكتۋرالار جازىپ، وعان وتاندىق مارتەبەسىن بەرىپ كەلگەن. قىلمىستىق ءىس اشكەرە بولدى. 1 ءىس بويىنشا ۇكىم شىعارىلدى، 2 قىلمىستىق ءىس سوتقا جولداندى. يمپورتتالعان 30 مىڭ توننادان استام رەسەيلىك استىققا جالعان شوت-فاكتۋرالار جازىلعان. ناتيجەسىندە 1 ميلليارد تەڭگەدەن استام سوماعا ترانزاكسيالاردىڭ كۇشىن جويۋ شارالارى قابىلداندى. وسىعان وراي مۇددەلى ورگاندارمەن بىرلەسە جۇمىس توبى قۇرىلىپ، ولار تاۋاردىڭ شىعارىلعان جەرىن راستايتىن قۇجاتتاردى الۋ ماسەلەسىن رەتتەيتىن زاڭناماعا وزگەرىستەر ەنگىزۋگە باستاماشىلىق ەتتى»، - دەيدى س ق و بويىنشا ەكونوميكالىق تەرگەپ- تەكسەرۋ دەپارتامەنتىنىڭ باسشىسى باقىتجان ابۋلحايروۆ.

بۇعان دەيىن س ق و- دا ماس كۇيدە كولىك جۇرگىزگەن اۋىل اكىمىنىڭ جۇمىستان بوساتىلعانىن جازعان ەدىك.