رەسەي ازاماتى اراعا 59 جىل سالىپ استانادا اناسىمەن قاۋىشتى

استانا. KAZINFORM - استانالىق پوليتسەيلەر رەسەي ازاماتىنا 59 جىلدان كەيىن اناسىن تابۋعا كومەكتەستى. اناسى مەن قىزىنىڭ كەزدەسۋىن ۋچاسكەلىك ينسپەكتور باقىتجان سارمانوۆ ۇيىمداستىردى.

- بيىل ناۋرىزدا پوليتسيا پۋنكتىنىڭ قىزمەتتىك نومىرىنە 59 جاستاعى رەسەي فەدەراتسياسىنىڭ ازاماتشاسى حابارلاسىپ، اناسىن تابۋعا كومەك سۇراعان. مايور سارمانوۆ جان-جاقتى تەكسەرۋ جۇرگىزىپ، ايەلدىڭ تۋىسىن انىقتاي الدى. ايەل اۋە بيلەتىن ساتىپ الىپ، جاقىندا قازاقستانعا ۇشىپ كەلدى، - دەپ حابارلايدى Polisia.kz.

اناسىمەن قاۋىشقان رەسەي ازاماتى ەلوردالىق پوليتسەيگە شەكسىز العىسىن جەتكىزدى. انىقتالعانداي، ول اناسىن كوپتەگەن جىل بويى تابا الماي جۇرگەن.

- مەن ءتىپتى ادامداردى ىزدەۋمەن اينالىساتىن تەلەباعدارلاماعا دا جۇگىندىم، ءبىراق، ەشقانداي ناتيجە بولمادى. ال باقىتجان سارمانوۆ مەنىڭ تۋىستارىمدى تاۋىپ بەردى. شەتەل ازاماتى رەتىندە مەن قازاقستان پوليتسياسىنىڭ زەيىندىلىگى مەن ۇقىپتىلىعىنا تاڭعالدىم، - دەدى رەسەيلىك ايەل.

قىزىمەن قاۋىشقان 78 جاستاعى قارت انا كوز جاسىن تىيا الماي، ءتارتىپ ساقشىلارىنا رازىلىق تانىتتى.

- بۇل وفيتسەر مەنىڭ وقيعاما تۇسىنىستىكپەن قاراپ، شىنايى جاناشىرلىق تانىتتى. ول ءوز قىزمەتتىك بورىشىن جەدەل ءارى ادال ورىندادى. وسىنداي قىزمەتكەر ءۇشىن العىس بىلدىرەمىن جانە سىزدەرگە وسىنداي ۇلگىلى پوليتسەيلەر كوپ بولسىن دەپ تىلەيمىن، - دەيدى قاريا.

بۇعان دەيىن اتىراۋدا بىلتىر قازاندا جوعالعان بويجەتكەندى جايىقتان ىزدەۋ قايتا جالعاسقانى تۋرالى حابارلاعان ەدىك.

اۆتور

داۋلەت ىزتىلەۋ