رەسپۋبليكا كۇنىنە تارتۋ: قوسشى قالاسىندا جابىق فۋتبول الاڭى اشىلدى

اقمولا وبلىسىنىڭ قوسشى قالاسىندا رەسپۋبليكا كۇنىنە وراي «قوسشى ارەنا» زاماناۋي جابىق فۋتبول الاڭى پايدالانۋعا بەرىلدى، دەپ حابارلايدى Kazinform

جاڭا سپورت نىسانىنىڭ اۋماعى — 12500 شارشى مەتر. جەكە ينۆەستيتسيا ەسەبىنەن سالىنعان. نىساندا كيىنەتىن، جۋىناتىن بولمە، كورەرمەندەرگە ارنالعان بالكون قاراستىرىلعان.

قوسشى قالاسى اكىمدىگىنىڭ مالىمەتىنشە، قالادا بالالار مەن جاس وسپىرىمدەردىڭ سپورتپەن شۇعىلدانۋى ءۇشىن بارلىق جاعداي جاسالىپ جاتىر.

سونىمەن بىرگە سپورت نىساندارىنىڭ سانىن ارتتىرۋ ءۇشىن وبلىستىق بيۋجەت قاراجاتى ەسەبىنەن دەنە شىنىقتىرۋ-ساۋىقتىرۋ كەشەنىنىڭ قۇرىلىسى جۇرگىزىلۋدە.

ونى 2024-جىلدىڭ ءبىرىنشى توقسانىندا پايدالانۋعا بەرۋ جوسپارلانعان.

جاقىندا بالالار مەن جاس وسپىرىمدەر سپورت مەكتەبى اشىلدى.

«وزدەرىڭىز بىلەتىندەي، «ۆەرنىي كاپيتال» قورى بيىل بالالارىمىزعا رەسپۋبليكا كولەمىندە تەڭدەسى جوق جاڭا مەكتەپ-گيمنازياسىن سىيلادى. ءبىزدىڭ وسى قورمەن الەۋمەتتىك سەرىكتەستىگىمىز جالعاسادى. قازىرگى ۋاقىتتا قوعامدىق مادەني-سپورت ورتالىعىنىڭ قۇرىلىسىن باستاۋ جوسپارلانعان»، - دەپ اتاپ ءوتتى قوسشى قالاسىنىڭ اكىمى گايدار قاسەنوۆ.

قالا باسشىسى اتاپ وتكەندەي، بيىل 400 ورىندىق مادەنيەت ءۇيىن سالۋ جوباسى ازىرلەنگەن. ول 2024-2025-جىلدارى جۇزەگە اسىرىلادى.

«بۇل كورسەتكىشتەر - قوسشى قالاسىندا سپورتتى دامىتۋ ءۇشىن جاعداي جاسالىپ جاتقاندىعىنىڭ دالەلى دەپ سانايمىن جانە وسى باعىتتاعى جۇمىس جالعاسادى»، - دەدى قالا باسشىسى.

جاڭا فۋتبول الاڭىنىڭ اشىلۋىنا اتا-انالار دا قۋانىپ وتىر.

«بالالارىمىز ەندى بوس ۋاقىتتارىن ءتيىمدى پايدالانادى جانە سۇيىكتى سپورت تۇرىمەن اينالىسادى. مەنىڭ ۇلىم فۋتبولعا اۋەس. بولاشاقتا اتاقتى فۋتبولشى بولعىسى كەلەدى. بالالارىمىزدىڭ كەلەشەگى ءۇشىن جاعداي جاسالىپ جاتقاندىعىنا ريزامىز»، - دەيدى قالا تۇرعىنى مارجان تولەۋوۆا.

ايتا كەتسەك، بۇدان بۇرىن رەسپۋبليكا كۇنىنە وراي كوكشەتاۋدا 65 وتباسى جاڭا پاتەردىڭ كىلتىن العانىن جازعان ەدىك.