پرەمەر-مينيستر تۇرعىن ءۇيدىڭ باستاپقى جارناسىن تومەندەتۋ تەتىكتەرىن ازىرلەۋدى تاپسىردى

- تاعى ءبىر ماڭىزدى ماسەلە - قولدانىستاعى وندىرىستىك قۋاتتاردى تولىق جۇكتەۋ جانە جاڭا جوبالاردى ۋاقتىلى ىسكە قوسۋ. كولىك مينيسترلىگى «قازاقستان تەمىر جولى» كومپانياسىمەن بىرگە وڭدەۋ كاسىپورىندارىنىڭ جۇمىسىنا قاجەتتى شيكىزات پەن قوسالقى بولشەكتەر تيەلگەن كونتەينەرلەردىڭ جانە ۆاگونداردىڭ ۇزدىكسىز جەتكىزىلۋىن قامتاماسىز ەتسىن. وزدەرىڭىزگە ءمالىم، گەولوگيالىق زەرتتەۋ جۇمىستارىن جەدەلدەتۋ جانە پەرسپەكتيۆالى جاڭا كەن ورىندارىن انىقتاۋ شيكىزات بازاسىن كەڭەيتە تۇسۋگە تىكەلەي ىقپال ەتەدى، - دەدى پرەمەر-مينيستر.

وسى رەتتە ۇكىمەت باسشىسى ونەركاسىپ مينيسترلىگىنە جىل سوڭىنا دەيىن گەولوگيالىق زەرتتەۋ جۇمىستارىنىڭ نەگىزگى كەزەڭدەرىن اياقتاپ، ناقتى ناتيجەلەردى ۇسىنۋدى تاپسىردى.

- سونداي-اق جوسپارلانعان 20,4 ميلليون شارشى مەتر تۇرعىن ءۇيدى ناقتى پايدالانۋعا بەرۋ قۇرىلىس سەكتورىنداعى باسىم مىندەت بولىپ قالا بەرەدى. بۇل رەتتە تۇرعىن ۇيلەر قاجەتتى ينفراقۇرىلىممەن جانە اباتتاندىرۋمەن قامتاماسىز ەتىلىپ، قونىستانۋعا تولىق دايىن بولۋعا ءتيىس. ءوڭىر اكىمدىكتەرى جەر تەلىمدەرىن الدىن الا ازىرلەپ، ينجەنەرلىك ينفراقۇرىلىم تارتۋ جۇمىستارىن تەزدەتۋى كەرەك. سونداي-اق تۇرعىن ءۇيدى قارجىلاندىرۋ تەتىكتەرىن جەتىلدىرىپ، ازاماتتار ءۇشىن تۇرعىن ءۇي باعدارلامالارىنىڭ قولجەتىمدىلىگىن ارتتىرۋ قاجەت. قارجى نارىعىن رەتتەۋ جانە دامىتۋ اگەنتتىگى ونەركاسىپ مينيسترلىگىمەن بىرلەسىپ، باستاپقى جارنا مولشەرىن تومەندەتۋ تەتىكتەرىن ەنگىزۋگە قاتىستى قوسىمشا ۇسىنىستار ازىرلەسىن، - دەدى ولجاس بەكتەنوۆ.

بۇعان دەيىن پرەمەر-مينيستر ۇكىمەتتىڭ باستى مىندەتى ينفلياتسيانى 10 پايىزدان تومەن دەڭگەيدە ۇستاپ تۇرۋ ەكەنىن ايتقان بولاتىن.