نۇرقانات سەرىكبايەۆ دزيۋدودان الەمدىك رەيتينگىدە ۇزدىك وندىققا كىردى
استانا. KAZINFORM - حالىقارالىق دزيۋدو فەدەراتسياسى (IJF) سپورتشىلاردىڭ جاڭارتىلعان رەيتينگىن جاريالادى.
66 كەلىدەگى وتانداسىمىز نۇرقانات سەرىكبايەۆ حورۆاتياداعى گران-پريدە جەڭىسكە جەتكەننەن كەيىن التى ساتىعا جوعارى كوتەرىلىپ، ونىنشى ورىنعا جايعاستى. جاڭارتىلعان رەيتينگىگە سايكەس قازاقستاندىق سپورتشىنىڭ ەنشىسىندە 2748 ۇپاي بار.
بۇل سالماقتا جاپونيالىق حيفۋمي ابە 5200 ۇپايمەن كوش باستادى. ونىڭ جەرلەسى تاكەشي تاكەوكا 5000 ۇپايمەن ەكىنشى ورىنعا جايعاستى. ال تاجىكستان وكىلى نۋرالي ەمومالي 4400 ۇپايمەن ۇزدىك ۇشتىكتى تۇيىندەپ تۇر.
سونداي-اق جاڭارتىلعان رەيتينگىدە امان باقىتجان 60 كەلى سالماقتا ءۇش ساتى جوعارى كوتەرىلىپ، 22-ورىنعا تۇراقتادى. ونىڭ ەنشىسىندە 2145 ۇپاي بار. ال 48 كەلى سالماقتاعى عاليا تىنبايەۆا بىردەن 13 ورىنعا جوعارىلاپ، 1141 ۇپايمەن 38-ساتىعا جايعاستى.
ەسكە سالساق، ەكى قازاقستاندىق دزيۋدوشى دا زاگرەبتەگى گران-پريدە كۇمىس مەدال يەلەنگەن ەدى.
بۇدان بولەك، ەراسىل قاجىبايەۆ (100 كەلىدەن جوعارى) التى ساتى جوعارىلاپ، 1235 ۇپايمەن 40-ورىنعا تۇراقتادى. ال ەسميگۇل كۋيۋلوۆا (63 كەلىگە دەيىن) بىردەن ون ساتى كوتەرىلىپ، 1103 ۇپايمەن 36-ورىنعا تابان تىرەدى.
ايتا كەتەيىك، شورت-ترەكتەن الەمدىك تۋردىڭ ءۇشىنشى كەزەڭىنە قاتىساتىن قازاقستان قۇراماسى بەلگىلى بولدى.