پرەمەر تاۋار وندىرۋشىلەردى قولداۋ جانە سۋ تاسقىنى جاعدايىن بولجاۋعا ارنالعان سيفرلىق قۇرالدارمەن تانىستى
استانا. KAZINFORM - پرەمەر-ءمينيستردىڭ تاپسىرماسى بويىنشا وتاندىق تاۋار وندىرۋشىلەردى قولداۋعا ارنالعان سيفرلىق قۇرالدار ازىرلەندى.
اتاپ ايتقاندا، ازىرلەنگەن جۇيەلەر ءاربىر وندىرىستىك كاسىپورىننىڭ جۇمىسىن قاداعالاۋعا، مەملەكەتتىك ورگاندار تاراپىنان ولاردىڭ مۇددەلەرىنە نۇقسان كەلتىرۋ فاكتىلەرىن ونلاين رەجيمىندە انىقتاۋعا مۇمكىندىك بەرەدى.
ماقسات - ەل نارىعىنداعى يمپورت ۇلەسىن تومەندەتۋ ءۇشىن وتاندىق ءونىمنىڭ دامۋىنا قوسىمشا سەرپىن بەرۋ.
قازاقستاننىڭ ءبىرقاتار وڭىرلەرىندەگى سۋ تاسقىنى جاعدايىن ەسكەرە وتىرىپ، سۋ تاسقىنىن مودەلدەۋ جانە سۋ قويمالارىنىڭ دەڭگەيىن بولجاۋ جۇيەسىنىڭ ءپروتوتيپى قارالدى. تاجىريبەلىك ۇلگىنى ازىرلەۋ اياسىندا درەناجدى مودەلدەۋ جانە ەسەپتەۋ الگوريتمدەرى جاسالدى، بىرنەشە وزەن ۋچاسكەلەرىندە پيلوتتىق سىناقتار جۇرگىزىلدى. تسيفرلىق قۇرال رەتتەلەتىن جانە رەتتەلمەيتىن درەناجدى ەسەپتەۋگە، سونداي-اق بەرىلگەن سۋ دەڭگەيىندەگى سۋ تاسقىنى ايماعىن كارتادا كورسەتۋگە مۇمكىندىك بەرەدى.
ۇكىمەت باسشىسى ولجاس بەكتەنوۆ ۇسىنىلعان سيفرلىق شەشىمدەردى ساراپتامالىق تالقىلاۋ قورىتىندىسىنا سايكەس جوبالاردى ماقۇلداپ، پيلوتتىق رەجيمدە ەنگىزۋ شارالارىن باستاۋدى تاپسىردى.
پرەمەر-مينيستر سۋ تاسقىنىنان كەلتىرىلگەن زالالدى وتەۋگە وتىنىمدەر قابىلداۋ قىزمەتىن قىسقا مەرزىمدە ىسكە قوسۋدى، سونداي-اق قولدا بار بەينەباقىلاۋ كامەرالارى ارقىلى ونلاين رەجيمدە سۋ تاسقىنىنا قارسى ءىس-شارالاردىڭ ورىندالۋىن ەسەپكە الۋ جانە باقىلاۋ جۇرگىزۋدى تاپسىردى.
«مەملەكەت باسشىسى ءوز جولداۋىندا قازاقستاندى IT- ەلگە اينالدىرۋ ءۇشىن ستراتەگيالىق ماڭىزدى مىندەت قويدى. دۇرىس باسقارۋشىلىق شەشىمدەردى قابىلداۋ ءۇشىن ساپالى جەدەل اقپاراتقا قول جەتكىزىپ، جاڭا تەحنولوگيالاردى قولدانۋ كەرەك. ۇسىنىلىپ وتىرعان تاسىلدەردى ەكونوميكانىڭ باسقا سالالارى بويىنشا كەڭەيتۋ قاجەت. بارلىق قۇرالدار مەن مالىمەتتەر قولجەتىمدى. دەرەكتەر الماسۋدى جانە جۇيەلەردى ينتەگراتسيالاۋدى دۇرىس جولعا قويۋ كەرەك»، - دەپ اتاپ ءوتتى ولجاس بەكتەنوۆ.
سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسينگە دەرەكتەردىڭ ۋاقتىلى جاڭارتىلۋىن جانە سيفرلىق قۇرالداردى ءومىردىڭ بارلىق سالالارىنا جەدەل ەنگىزۋدى قامتاماسىز ەتۋ تاپسىرىلدى.
