پرەمەر-مينيستر ەسىرتكىگە قارسى كۇرەستى كۇشەيتۋدى تاپسىردى
استانا. KAZINFORM — پرەمەر-مينيستر ولجاس بەكتەنوۆ ىشكى ىستەر مينيسترلىگىنىڭ الدىنا ەسىرتكىگە قارسى كۇرەستى كۇشەيتۋ ءۇشىن قابىلدانىپ جاتقان شارالاردىڭ تيىمدىلىگىن تالداۋ مىندەتىن قويدى. بۇل تۋرالى ۇكىمەت وتىرىسىندا ايتىلدى.
بۇگىنگى تاڭدا تىيىم سالىنعان زاتتاردى تۇتىنۋ دەڭگەيى تومەندەمەيتىنى اتاپ ءوتىلدى، بۇل رەتتە تارالۋ تاسىلدەرى كەڭەيىپ كەلەدى. اسىرەسە تۇنگى كلۋبتاردا ەسىرتكىنى ناسيحاتتاۋ جانە ساتۋ بەلسەندى جۇرگىزىلىپ وتىر. ونى تاراتۋعا 14 جاسقا دەيىنگى بالالار قاتىسا باستادى.
— الەۋمەتتىك جەلىلەر ارقىلى وڭاي ساتىپ الۋعا بولاتىن ەسىرتكىنىڭ جاڭا تۇرلەرى پايدا بولۋدا. وسىعان بايلانىستى، ىشكى ىستەر مينيسترىنە جاۋاپتى بولىمشەلەردىڭ جۇمىسىن قاتاڭ تۇردە باعالاۋدى جانە ەسىرتكى بيزنەسىنە قارسى كۇرەستى كۇشەيتۋ جونىندە شارالار قابىلداۋدى تاپسىرامىن، — دەپ اتاپ ءوتتى ولجاس بەكتەنوۆ.
بۇعان دەيىن حابارلانعانداي، اقتوبەدە ەسىرتكى دايىنداپ، ادام ولتىرگەن مەكتەپ مۇعالىمى سوتتالدى.
