پرەمەر-مينيستر: الەۋمەتتىك شىعىنداردىڭ تيىمدىلىگىنە سۇراق كوپ
استانا. KAZINFORM - پرەمەر-مينيستر ولجاس بەكتەنوۆ ۇكىمەتتىڭ كەڭەيتىلگەن وتىرىسىندا ۇلتتىق قور اقشاسىن تەك ءىرى ينفراقۇرىلىمدىق جوبالارعا عانا جۇمسالاتىنىن ءمالىم ەتتى.

- ۇلتتىق قوردىڭ قاراجاتى، ءسىز تاپسىرعانىڭىزداي، تەك ءىرى ينفراقۇرىلىمدىق وبەكتىلەردى سالۋ ءۇشىن عانا سۇرالاتىن بولادى. سونىمەن قاتار ءبىز مەملەكەتتىك شىعىستاردىڭ تيىمدىلىگىن ارتتىرىپ، بيۋدجەت ءتارتىبىن نىعايتامىز. سۋبسيديالاۋ شىعىندارى بارلىق سالادا توقتاۋسىز ءوسىپ بارادى. ونىڭ ۇستىنە ولاردىڭ ناقتى اسەرى ەسەپكە الىنبايدى، ءارى مەملەكەتتىك ورگانداردىڭ تاراپىنان باقىلاۋ دا ءالسىز. سۋبسيديا الۋ كەيبىر كومپانيالاردىڭ بيزنەس- مودەلىنىڭ ءبىر بولىگىنە اينالدى، - دەدى پرەمەر-مينيستر.
ولجاس بەكتەنوۆ سوڭعى 3 -جىلدا 2,2 تريلليون تەڭگەلىك 770 جوبانىڭ سمەتالىق قۇنى قىمباتتاعانىن، مۇنداي تەندەنتسيانىڭ كۇماندى جاقتارى دا بار ەكەنىن ايتتى.
- رەسپۋبليكالىق جانە جەرگىلىكتى بيۋدجەت شىعىستارىنىڭ جارتىسىنان كوبى - 18 تريلليون تەڭگەدەن استام سوما الەۋمەتتىك سالاعا باعىتتالىپ وتىر. ال، بۇل شىعىنداردىڭ تيىمدىلىگىنە قاتىستى ۇلكەن سۇراق بار. 9 ورتالىق جانە بارلىق جەرگىلىكتى اتقارۋشى ورگاندار الەۋمەتتىك شىعىستاردىڭ اكىمشىلەرى بولىپ تابىلادى. بۇل وسى شىعىستاردىڭ بولشەكتەنىپ جانە وعان باقىلاۋدىڭ بوساڭسىپ كەتۋىنە الىپ كەلەدى، - دەدى ۇكىمەت باسشىسى.
پرەمەر-مينيستر سيفرلىق قۇرالدار ارقىلى الەۋمەتتىك ماقساتتارعا جۇمسالاتىن بيۋدجەت قارجىسىن باقىلاۋ كۇشەيتىلگەنىن اتاپ ءوتتى. پيلوتتىق رەجيمدە تاراز، شىمكەنت، تۇركىستان جانە ورال قالالارىندا بالاباقشالاردى قارجىلاندىرۋدىڭ اشىق سيفرلىق تەتىگى ەنگىزىلگەن.
- بۇل جالعان مالىمەتتەردى الىپ تاستاۋ ەسەبىنەن 4 قالانىڭ وزىندە عانا 20 ميلليارد تەڭگەدەن استام قاراجات ۇنەمدەۋگە مۇمكىندىك بەرەدى. ءقازىر بۇل تاجىريبە ەلوردادا ەنگىزىلۋدە، بيىلعى جىلدىڭ سوڭىنا دەيىن بۇكىل ەل اۋماعىنا تاراتىلاتىن بولادى، - دەدى و. بەكتەنوۆ.
ايتا كەتەيىك، ەلوردادا پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر.
اۆتور
ەسىمجان ناقتىباي