پرەمەر-ءمينيستردىڭ ورىنباسارى مۇناي باعاسىنىڭ تومەندەۋ مۇمكىندىگىنە تۇسىنىك بەردى

استانا. KAZINFORM - ەگەر مۇناي باعاسى ايتارلىقتاي تومەندەسە، كەيىن ول كۇرت كوتەرىلەدى. بۇل تۋرالى پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ءمالىم ەتتى.

بۇگىن پارلامەنت ماجىلىسىندەگى باسپا ءسوز ءماسليحاتىندا تىلشىلەر مۇناي باعاسىنىڭ تومەندەۋى مۇمكىندىگى تۋرالى سۇرادى.

«ارينە، پەسسيميستىك سەناريدى دە قاراستىرىپ وتىرمىز. ونىڭ اياسىندا مۇناي قۇنى باررەلىنە 60 دوللارعا دەيىن ءتۇسۋى ىقتيمال... مەنىڭ ويىمشا، كەلەر جىلدىڭ ءبىرىنشى توقسانىندا جاعداي تۇسىنىكتى بولادى، ياعني سول كەزدە امەريكادا جاڭا اكىمشىلىك كەلىپ، ءوزىنىڭ ەكونوميكالىق ءىس- شارالارىن جاريالايدى. بۇل رەتتە ءتۇرلى ساراپشىلار «ساۋدا» سوعىستارى بولاتىنى جايىندا تۇجىرىم جاساپ وتىر. امەريكا ەكونوميكاسىنىڭ ىشكى دامۋىنا باسا نازار اۋدارىلادى دەگەن پىكىرلەر بار»، - دەدى ن. بايبازاروۆ.

ونىڭ سوزىنە قاراعاندا، مۇناي باعاسىنا ساياسي جاعدايلار اسەر ەتەدى. دەگەنمەن بۇل سالادا ءار تاراپ ۇستاناتىن ءتيىستى بالانس بار.

«ءبىز وسىنداي جاعدايلاردى باستان وتكەردىك. تاريحقا كوز جۇگىرتسەك، ەگەر مۇناي باعاسى ايتارلىقتاي تومەندەسە، كەيىن ول كۇرت كوتەرىلەدى. ويتكەنى ونى ءوندىرۋ كەرەك، ول ءۇشىن مۇناي كەن ورىندارىنا ۇنەمى ينۆەستيتسيا سالۋ قاجەت. ينۆەستيتسياسىز سالا تۇرالاپ قالادى. ال ينۆەستيتسيا ءۇشىن تەڭدەستىرىلگەن مۇناي باعاسى قاجەت. وسىنىڭ ءبارىن ەسكەرە وتىرىپ، باررەلىنە 75 دوللار شاماسىنداعى دالىزدە قالامىز دەگەن ويدامىن»، - دەدى مينيستر.

قاراشا ايىنىڭ باسىندا ا ق ش- تاعى پرەزيدەنت سايلاۋىندا دونالد ترامپ جەڭىسكە جەتكەننەن كەيىن الەمدىك قور نارىقتارىندا ءوسىم بايقالدى.