گەرمانيانىڭ سىرتقى ىستەر ءمينيسترى مىندەتتى اسكەري بورىشتى قايتا ەنگىزۋدى قولدادى

استانا. KAZINFORM - گەرمانيانىڭ سىرتقى ىستەر ءمينيسترى يوحانن ۆادەفۋل ەلدە مىندەتتى اسكەرگە شاقىرۋدى دەرەۋ قايتا ەنگىزۋدى جاقتايتىنىن مالىمدەدى، دەپ حابارلايدى ت ا س س.

- مەن اسكەري مىندەتتى دەرەۋ ەنگىزۋدى قولدايمىن، - دەدى مينيستر.

ول وسى ماسەلەنى بىرنەشە رەت كوتەرگەنىن ەسكە سالدى.

- الايدا ءبىز بۇل سۇراقتى كواليتسيا ىشىندە تالقىلاۋعا ءماجبۇرمىز. ۇكىمەت ءوز ۇسىنىستارىن جاريالادى، ەندى پارلامەنتتەگى فراكسيالار كەلىسسوزدەر جۇرگىزىپ، زاڭنىڭ قانداي بولاتىنى جونىندە شەشىم قابىلداۋى ءتيىس. سونىمەن قاتار بارلىق جاعدايدى ەسكەرۋ قاجەت، - دەپ ءتۇسىندىردى ۆادەفۋل.

كۇتىلىپ وتىرعانداي، بۋندەستاگ الداعى اپتادا گەرمانياداعى اسكەري قىزمەتتىڭ جاڭا ۇلگىسى جونىندەگى زاڭ جوباسىن العاش رەت تالقىلايدى. گەرمانيا قورعانىس مينيسترلىگى بۋندەسۆەردىڭ سانىن 260 مىڭ اسكەري قىزمەتكەرگە، ال رەزەرۆىن 200 مىڭ ادامعا دەيىن ارتتىرۋدى كوزدەپ وتىر.

27 -تامىزدا گەرمانيا ۇكىمەتى قورعانىس ءمينيسترى بوريس پيستوريۋستىڭ جاڭا اسكەري قىزمەت ۇلگىسىن قاراستىراتىن زاڭ جوباسىن قابىلداعان ەدى. ول شۆەتسيا تاجىريبەسىنە نەگىزدەلگەن ەرىكتى قىزمەت مودەلىن ۇسىنادى. بۇل ەلدە بارلىق مەكتەپ تۇلەكتەرى مەديتسينالىق تەكسەرىستەن وتەدى، الايدا ولاردىڭ ءبىر بولىگى عانا اسكەرگە الىنادى.

قۇجاتتا مىندەتتى تۇردە ورىندالاتىن باپتار دا بار. اتاپ ايتقاندا، اسكەرگە شاقىرىلۋشىلاردى قايتا مەديتسينالىق تەكسەرۋدەن وتكىزۋ جانە 18 بەن 25 جاس ارالىعىنداعى ەر ازاماتتارعا اسكەري قىزمەتكە دايىندىق جايلى ءوتىنىش تولتىرۋ مىندەتى ەنگىزىلگەن. زاڭ جوباسىندا جالپىعا ورتاق اسكەري مىندەتتى قايتا ەنگىزۋ مۇمكىندىگى دە جوققا شىعارىلماعان.

گەرمانيادا مىندەتتى اسكەري بورىش 2011 -جىلدىڭ شىلدەسىندە كۇشىن جويىپ، ەل كاسىبي ارميا جۇيەسىنە كوشكەن بولاتىن.

ايتا كەتەلىك گەرمانيادا جاسى 100 دەن اسقان ادامداردىڭ سانى ارتقانى تۋرالى جازعان ەدىك.