گەرمانيانىڭ مانگەيم قالاسىندا ءبىر توپ ادامدى كولىك باسىپ كەتتى

استانا. KAZINFORM - جەرگىلىكتى جۋرناليستەر وقيعا ورنىندا برەزەنتپەن جابىلعان ءبىر ادامنىڭ دەنەسى بايقالعانىن ايتادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

كولىكتىڭ سوقتىعىسۋى سالدارىنان كەم دەگەندە ءبىر ادام قايتىس بولدى. تاعى 25 ى جاراقات الدى، ولاردىڭ 15 ىنىڭ جاعدايى اۋىر، دەيدى جەرگىلىكتى ب ا ق. Reuters اگەنتتىگى كۋاگەرلەرگە سىلتەمە جاساي وتىرىپ، وقىس وقيعا بولعان جەردە بىرنەشە ادام جاتقانىن حابارلادى. سول ساتتە زارداپ شەككەن ەكى ادامعا رەانيماتسيالىق شارالار جۇرگىزىلىپ جاتقانى دا ايتىلدى.

سونىمەن قاتار، پوليتسيا قالا ورتالىعىندا اۋقىمدى وپەراتسيا جۇرگىزىپ جاتقانى بەلگىلى بولدى. قۇقىق قورعاۋ ورگاندارىنىڭ مالىمەتىنشە، وقىس وقيعا كارناۆال شەرۋى ءوتىپ جاتقان قالانىڭ ورتالىق الاڭىندا بولعان. پوليتسيا قالا تۇرعىندارىن مانگەيم ورتالىعىنان اۋلاق بولۋعا جانە ۇيلەرىنەن شىقپاۋعا شاقىرادى. سەبەبى اتالمىش جاعداي «ومىرگە قاۋىپ توندىرەتىن» دەپ باعالانادى.

بۇل رەتتە پوليتسيا وكىلى «تەرگەۋ جەدەل قارقىنمەن جۇرگىزىلىپ جاتقانىن» حابارلادى. الايدا، اقپارات جاريا ەتىلگەن كەزدە ىقتيمال قىلمىسكەرگە قاتىستى قانداي دا ءبىر دەرەكتەر ايتىلمادى.

دەگەنمەن Bild مالىمەتى بويىنشا كولىك جۇرگىزۋشىسى ۇستالدى. بادەن-ۆيۋرتەمبەرگ ىشكى ىستەر ءمينيسترى DPA-عا بەرگەن سۇحباتىندا كۇدىكتى رەينلاند-پفالتس تۋماسى، 40 جاستاعى نەمىس ازاماتى ەكەنىن ناقتىلاعان.

دەگەنمەن، كۇدىكتى ۇستالسا دا، قالا ورتالىعىنداعى بارلىق جول جابىلدى. ورتالىقتان تىس بارلىق جول مەن كوپىرلەردە اۆتومات اسىنعان پوليتسەيلەر قۇجات تەكسەرۋگە كىرىستى. باسىلىم ۇسىنعان اقپاراتقا سايكەس مانگەيمە اسپانىندا تىكۇشاقتار قالاعا شولۋ جاساپ ءجۇر.

مانگەيم بادەن-ۆيۋرتەمبەرگ فەدەرالدى شتاتىنىڭ سولتۇستىگىندە گەسسەن جانە رەينلاند-پفالتس شەكاراسىندا ورنالاسقان. قالادا شامامەن 320 مىڭ ادام تۇرادى - بۇل بادەن-ۆيۋرتەمبەرگتەگى ەكىنشى ۇلكەن قالا.

ەسكە سالساق، سوڭعى اپتالاردا گەرمانيادا وسىعان ۇقساس بىرنەشە شابۋىل بولدى. 2024 -جىلدىڭ جەلتوقسانىندا ماگدەبۋرگتە ساۋد ارابياسىنىڭ تۋماسى، 50 جاستاعى پسيحياتر روجدەستۆولىق بازار قوناقتارىن كولىكپەن باسىپ ءوتىپ، سالدارىنان التى ادام قايتىس بولدى. اقپان ايىنىڭ ورتاسىندا 24 جاستاعى اۋعان بوسقىنى ءوز كولىگىمەن ميۋنحەندەگى دەمونسترانتتار توبىن قاعىپ كەتتى. وقيعا ورنىندا جاس ايەل مەن بالا ءتىل تارتپاي كەتتى.

اۆتور

اينۇر تۋماكبايەۆا