گەرمانياداعى جارمەڭكەدە ادامداردى كولىكپەن تاپتاعان كۇدىكتىنىڭ كىم ەكەنى بەلگىلى بولدى

استانا. KAZINFORM - گەرمانيانىڭ ماگدەبۋرگ قالاسىندا جۇما كۇنى كەشكى ۋاقىتتا جارمەڭكەدە ادامداردى كولىكپەن تاپتاعان كۇدىكتىنىڭ كىم ەكەنى بەلگىلى بولدى، دەپ حابارلايدى Kazinform اگەنتتىگى BBC- گە سىلتەمە جاساپ.

گەرمانيانىڭ شىعىسىنداعى ماگدەبۋرگ قالاسىندا وتكەن روجدەستۆولىق جارمەڭكەدە كولىك تاپتاپ كەتكەن 5 ادام قازا بولدى. كۇدىكتى كوپ ۇزاماي ۇستالدى. ول ساۋد ارابياسىنان كەلگەن دارىگەر بولىپ شىقتى.

بارلىعى 200 دەن استام ادام جارالانعان. ولاردىڭ كوبىسىنىڭ جاعدايى اۋىر. جەرگىلىكتى بيلىكتىڭ دەرەگىنشە، قازا بولعاندار اراسىندا بالا دا بار.

سەنبى كۇنى تۇستەن كەيىن بولعان باسپا ءسوز ءماسليحاتىندا پروكۋرور حورست ۋولتەر نوپەنس تەرگەۋشىلەر كۇدىكتىمەن سويلەسۋدى جالعاستىرىپ جاتقانىن، وعان 5 ادامدى ءولتىرىپ، تالاي ادامعا اۋىر دارەجەدەگى دەنە جاراقاتىن كەلتىردى دەگەن ايىپ تاعىلعانىن ايتتى.

كەيىن بىرنەشە ب ا ق، ونىڭ ىشىندە بي-بي-سي كۇدىكتىنىڭ اتى ءجونىن جاريالادى: تالەب ال-ابدۋلموحسەن.

بەلگىلى بولعانداي، 50 جاستاعى كۇدىكتى بەرنبۋرگ قالاسىندا تۇرىپ، جۇمىس ىستەگەن پسيحياتر. ول 2006-جىلى گەرمانياعا وقۋعا كەلىپ، 2016-جىلى بوسقىن دەپ تانىلعاندىقتان وسىندا قالىپ قويعان. قازىرگى ۋاقىتتا ونىڭ تۇراقتى تۇرۋعا رۇقساتى بار.

وسىعان دەيىن مەملەكەت باسشىسى گەرمانيا پرەزيدەنتى فرانك-ۆالتەر شتاينمايەرگە كوڭىل ايتۋ جەدەلحاتىن جىبەرگەنىن حابارلادىق.