گەرمانيادا ەر ادام كوۆيدكە قارسى 217 رەت ەكپە سالعىزدى
استانا. KAZINFORM - زەرتتەۋشىلەردىڭ ايتۋىنشا، سوڭعى 29 ايدا COVID-19 تۋدىراتىن ۆيرۋسقا قارسى 217 دوزا ۆاكسينا العان نەمىس ازاماتىنان ەشقانداي جاناما اسەرى بايقالماعان. ماگدەبۋرگ قالاسىنىڭ 62 جاستاعى تۇرعىنى قاۋىپتى ۆيرۋس جۇقتىرعان جوق، دەپ حابارلايدى euronews.
نيۋرنبەرگتەگى ەرلانگەن ۋنيۆەرسيتەتىنىڭ زەرتتەۋشىلەرى مالىمدەگەندەي، ەر ادام ەكپەنى «ادەيى جانە جەكە سەبەپتەرمەن» كوپ مولشەردە كوپ سالدىرتقان.
ولار ەر ادام تۋرالى گازەتتەن وقىعاننان كەيىن ونىمەن بايلانىسىپ، ونىڭ دەنەسىنىڭ COVID-19 ۆاكسينالارىنا رەاكتسياسىن زەرتتەۋ ءۇشىن سىناقتار جۇرگىزۋدى سۇرادى.
«ءبىزدىڭ زەرتتەلۋشىگە بارلىعى سەگىز ءتۇرلى ۆاكتسينا، سونىڭ ىشىندە ءارتۇرلى قولجەتىمدى م ر ن ق- ۆاكسينالارى ەگىلدى. وسىنداي گيپەرۆاكتسيناتسياعا قاراماستان، ودان ەشقانداي جاناما اسەرلەر بايقالماعانى پرەپاراتتاردىڭ وتە جاقسى ەكەنىن كورسەتەدى»، - دەدى ەرلانگەن-نيۋرنبەرگ ۋنيۆەرسيتەتىنىڭ دوكتورى كيليان شوبەر.
زەرتتەۋشىلەر توبى ۆاكتسينانىڭ ءۇش دوزاسىن العان باقىلاۋ توبىنداعى ادامدارعا قاراعاندا ەر ادامدا كوروناۆيرۋسقا قارسى يممۋندىق جاسۋشالار مەن انتيدەنەلەر جوعارى ەكەنىن انىقتادى.
«شامادان تىس ۆاكسيناتسيا» يممۋندىق جۇيەنىڭ بۇزىلۋىنا نەمەسە جاناما اسەرلەرگە اكەلمەدى.
پروكۋرور الاياقتىق ءىسىنىڭ ءبىر بولىگى رەتىندە توعىز اي ىشىندە 130 ۆاكسينانى قارادى، ءبىراق بۇل ادامعا قاتىستى قىلمىستىق ءىس قوزعالعان جوق، دەيدى زەرتتەۋشىلەر.
تاعى 108 ەكپە جەكەلەي تارتىپتە تىركەلىپ، پروكۋرور دەرەكتەرىمەن ءىشىنارا سايكەس كەلگەن.
زەرتتەۋشىلەر زەرتتەۋ تەك ءبىر جاعدايدى قاراستىرعانىن جانە ولاردى حالىققا جالپىلاي المايتىنىن ەسكەرتتى.
بۇل جاعدايدى سىناپ كورگەن ماماندار زەرتتەۋ بارىسىندا تەك ءبىر وقيعا عانا نازارعا الىنعانىن جانە كوپشىلىككە بۇدان شىققان قورىتىندى دۇرىس دەپ ايتۋدان اۋلاق ەكەنىن ەسكەرتتى.
