گەرمانيادا ءبىر جىلعا ارنالعان «مۇمكىندىكتەر كارتاسى» ەنگىزىلەدى
2024 -جىلى گەرمانيادا بىلىكتى ماماندار ءۇشىن ەلگە كىرۋ تالاپتارى جەڭىلدەتىلىپ، بوسقىندارعا، كەرىسىنشە كۇشەيتىلەدى. KazInform اگەنتتىگى بۇل تۋرالى DW اقپارات اگەنتتىگىنە سىلتەمە جاساپ حابارلايدى.
ءبىر جىلعا ارنالعان «مۇمكىندىكتەر كارتاسى» ەنگىزىلەدى
كەلەسى جىلى جۇمىسقا ورنالاسۋ ءۇشىن ەلدە ءبىر جىل تۇرۋعا ىقتيارحاتقا كەپىلدىك بەرەتىن بالدىق جۇيەگە نەگىزدەلگەن «مۇمكىندىكتەر كارتاسى» تولىق كۇشىنە ەنەدى. ونى الۋ ءۇشىن ءوتىنىش بەرۋشى اعىلشىن جانە نەمىس ءتىلىن ءبىلۋى، جۇمىس تاجىريبەسى، سونداي- اق گەرمانيادا جەكە بايلانىستارى بولۋى كەرەك. الەۋەتتى ەميگرانتتىڭ جاسىنا دا باسىمدىق بەرىلەدى.
جۇمىس ۆيزاسىن الۋ ءۇشىن ەڭ تومەنگى جالاقى دەڭگەيى تومەندەيدى
گەرمانياعا كەلەتىن شەتەلدىك ماماندار قولىندا ەندى ەڭ تومەنگى جىلدىق جالاقىسى 43800 ەۋرونى قۇرايتىن كەلىسىمشارت بولۋى كەرەك. بۇرىن بۇل دەڭگەي سالىق ۇستاپ قالۋعا دەيىن 58400 ەۋرو بولعان.
Blue Card الۋ ءۇشىن ماماندىق تۇرلەرى كوبەيدى
جاڭا جىلدان باستاپ Blue Card, ياعني “كوگىلدىر كارتانى” گەرمانيادا اسا مۇقتاج ماتەماتيكتەر، IT ماماندارى، ينجەنەرلەر، بيولوگتار مەن مەديتسينا قىزمەتكەرلەرى عانا ەمەس، باسقا ماماندىق يەلەرى دە الا الادى. ولاردىڭ قاتارىندا فارماتسيەۆتەر، تاربيەشىلەر جانە ناۋقاستار مەن قارتتاردى كۇتۋشىلەر دە بار.
ەسكەرتۋسىز دەپورتاتسيا
گەرمانيادان پانا ىزدەگەندەر ءۇشىن تالاپ كۇشەيتىلۋى ابدەن مۇمكىن. ەلدىڭ ءى ءى م جوسپارىنا سايكەس، بولاشاقتا بوسقىن مارتەبەسى بەرىلمەگەن ازاماتتارعا ەلدەن شىعارۋ تۋرالى الدىن الا حابارلانبايدى، ال دەپورتاتسيا ءۇشىن رۇقسات ەتىلگەن قاماۋ مەرزىمى 10 نان 28 كۇنگە دەيىن ۇزارتىلادى.
الەۋمەتتىك تولەمدەر قىسقارادى
قازىرگى ۋاقىتتا پانا ىزدەۋشىلەر گەرمانيادا 18 ايدان استام ۋاقىت تۇرسا، الەۋمەتتىك جاردەماقى (Bürgergeld) الا باستايدى. ەلدە بۇدان از ۋاقىت تۇرعان بوسقىندار الدەقايدا از تولەم الادى. ەندى بۇل مەرزىم 36 ايعا دەيىن ۇلعايتىلدى.
قولما-قول اقشانىڭ ورنىنا كارتا بەرىلەدى
2024 -جىلى ەلدەن پانا ىزدەگەندەر الەۋمەتتىك تولەمدەردى قولما-قول اقشامەن المايدى-ونىڭ ورنىنا اقشا دۇكەندەردە تولەۋگە بولاتىن ارنايى دەبەتتىك كارتاعا اۋدارىلادى. فەدەرالدى ۇكىمەت پانا ىزدەۋشىلەردىڭ وزدەرىنىڭ شىققان ەلدەرىنە اقشا جىبەرۋ مۇمكىندىگىن وسىلايشا شەكتەگىسى كەلەدى.
اۆتور
زارينا تۋعانبايەۆا
