نۇرلىبەك نالىبايەۆ قىتايدا ترانسكاسپي باعىتىن دامىتۋ ماسەلەسىن كوتەردى

فورۋمنىڭ سالتاناتتى اشىلۋ راسىمىندە نۇرلىبەك نالىبايەۆ قازاقستاننىڭ كولىك سالاسىن دامىتۋداعى باسىم باعىتتارىن، حالىقارالىق ماڭىزى بار ينفراقۇرىلىمدىق جوبالاردى، قازاقستان مەن قىتاي اراسىنداعى جۇك تاسىمالى كولەمىنىڭ تۇراقتى ءوسىمىن جانە كولىك- لوگيستيكا سالاسىنداعى ەكىجاقتى ىنتىماقتاستىقتىڭ جاڭا مۇمكىندىكتەرىن تانىستىردى.

ساپار باعدارلاماسىنىڭ ماڭىزدى بولىگى – ق ر پرەمەر-ءمينيسترىنىڭ ءبىرىنشى ورىنباسارىنىڭ ق ح ر مەملەكەتتىك كەڭەسى پرەمەرىنىڭ ورىنباسارى، قازاقستان - قىتاي ىنتىماقتاستىق كوميتەتىنىڭ تەڭ ءتوراعاسى دين سيۋەسيانمەن العاشقى ەكىجاقتى كەزدەسۋى بولدى.

كەزدەسۋدە تاراپتار ەكى ەلدىڭ ساۋدا-ەكونوميكالىق ىنتىماقتاستىعىن كەڭەيتۋ، اۋىل شارۋاشىلىعى مەن جوعارى تەحنولوگيالار سالالارىنداعى جانە ءوڭىرارالىق بايلانىستاردى دامىتۋ، ينۆەستيتسيالىق ءوزارا ءىس-قيمىلدى جانداندىرۋ، ترانسشەكارالىق وزەندەر ماسەلەلەرىنە، قازاقستان - قىتاي ىنتىماقتاستىق كوميتەتىنىڭ قىزمەتىنە، ەكىجاقتى ىنتىماقتاستىقتىڭ باسقا دا وزەكتى باعىتتارىنا نازار اۋداردى.

نۇرلىبەك نالىبايەۆ ترانسكاسپيي حالىقارالىق كولىك باعىتىنا (ت ح ك ب) ارنالعان جوعارى دەڭگەيدەگى سەسسيادا ءسوز سويلەدى.

اتالعان سەسسياعا ق ح ر بۇكىلقىتايلىق حالىق وكىلدەرى جينالىسى تۇراقتى كوميتەتى ءتوراعاسىنىڭ ورىنباسارى شوحرات زاكير، ازەربايجان رەسپۋبليكاسى پرەمەر-ءمينيسترىنىڭ ورىنباسارى شاحين مۋستافايەۆ جانە قىرعىز رەسپۋبليكاسى مينيسترلەر كابينەتى ءتوراعاسىنىڭ ورىنباسارى ەرليست اكۋنبەكوۆ قاتىسىپ، بايانداما جاسادى.

قاتىسۋشىلار ت ح ك ب- نىڭ حالىقارالىق جۇك تاسىمالى جۇيەسىندەگى ءرولى جىل سايىن ارتىپ كەلە جاتقانىن جانە ونىڭ قىتاي مەن ەۋروپانى بايلانىستىراتىن ماڭىزدى كولىك دالىزىنە اينالعانىن اتاپ ءوتتى.

سەسسيادان كەيىن وتكەن فورۋمنىڭ سالتاناتتى اشىلۋ راسىمىنە شەت مەملەكەتتەردىڭ ۇكىمەتتىك جانە مينيسترلىك دەڭگەيدەگى دەلەگاتسيالارى، حالىقارالىق ۇيىمداردىڭ، ديپلوماتيالىق كورپۋستىڭ، ساراپشىلار قاۋىمداستىعى مەن ىسكەرلىك توپتاردىڭ مىڭعا جۋىق وكىلى قاتىستى.

ساپار شەڭبەرىندە قىتايلىق «China Communications Construction Company» (CCCC) پرەزيدەنتى چجان بيننانمەن جانە «CITIC Group» كومپانياسى ديرەكتورلار كەڭەسىنىڭ ءتوراعاسى سي گوحۋامەن ەكىجاقتى كەزدەسۋلەر ءوتتى.

تاراپتار قازاقستانعا ينۆەستيتسيا تارتۋ، بىرلەسكەن ينۆەستيتسيالىق جانە ينفراقۇرىلىمدىق جوبالاردى جۇزەگە اسىرۋ، جاڭا سالالارداعى ىنتىماقتاستىق مۇمكىندىكتەرىن تالقىلادى.

فورۋمنان بۇرىن قازاقستان رەسپۋبليكاسىنىڭ قىتاي حالىق رەسپۋبليكاسىنداعى ەلشىلىگىندە «CITIC Group» ديرەكتورلار كەڭەسىنىڭ ءتوراعاسى سي گوحۋانى II دارەجەلى «دوستىق» وردەنىمەن سالتاناتتى ماراپاتتاۋ ءراسىمى ءوتتى.

قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ اتىنان جوعارى مەملەكەتتىك ماراپاتتى نۇرلىبەك نالىبايەۆ تابىستاپ، سي گوحۋانىڭ قازاق-قىتاي دوستىعىن نىعايتۋعا جانە ءوزارا ءتيىمدى ساۋدا-ەكونوميكالىق ىنتىماقتاستىقتى دامىتۋعا قوسقان ەلەۋلى جەكە ۇلەسىن اتاپ ءوتتى.

سونداي-اق «دوستىق» وردەنىن تابىستاۋ قازاق-قىتاي قاتىناستارىنىڭ بەرىكتىگىن ايقىندايتىن تاعى ءبىر سيمۆولعا اينالىپ، «CITIC Group» كومپانياسىمەن ىنتىماقتاستىقتى ودان ءارى كەڭەيتۋگە قوسىمشا سەرپىن بەرەتىنىنە سەنىم ءبىلدىردى.

سي گوحۋا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلىنا جوعارى مەملەكەتتىك ماراپات ءۇشىن شىنايى العىسىن ءبىلدىردى. بۇل ماراپاتتى ەكى مەملەكەت باسشىلارىنىڭ ستراتەگيالىق باسشىلىعىمەن جۇزەگە اسىرىلىپ جاتقان بىرلەسكەن كۇش-جىگەردى، قازاقستان مەن قىتايدىڭ ىسكەرلىك توپتارىنىڭ ەكىجاقتى ىنتىماقتاستىقتى نىعايتۋعا قوسقان ۇلەسىن مويىنداۋ رەتىندە باعالادى.

«CITIC Group» باسشىسى قازاق-قىتاي قاتىناستارىنىڭ ەرەكشە سيپاتىنا جانە ەكى ەلدىڭ ىسكەرلىك توپتارىنىڭ جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋعا، مەملەكەتتەر اراسىنداعى ساۋدا-ەكونوميكالىق جانە ينۆەستيتسيالىق ءوزارا ءىس-قيمىلدى ىلگەرىلەتۋگە جاۋاپكەرشىلىكپەن قارايتىنىن اتاپ ءوتتى.

وسىعان دەيىن چۋنتسيننەن الماتىعا العاش رەت تىكەلەي اۋە رەيسى اشىلعانى تۋرالى جازدىق.