ەرلى-زايىپتى الاياقتارعا كومەكتەسكەن: پوليتسيا SIM-box قۇرىلعىلارى مەن كارتالار تاركىلەدى
پاۆلودار. KAZINFORM - پاۆلودار قالاسىندا پوليتسيا قىزمەتكەرلەرى «تەلەفون» الاياقتارىنا كومەكتەسكەن وتباسىلىق جۇپتى ۇستادى، دەپ حابارلايدى Polisia.kz.

جەدەل ىزدەستىرۋ ءىس- شارالارى ءىىم كيبەرقىلمىسقا قارسى ءىس- قيمىل دەپارتامەنتىنىڭ ۇيلەستىرۋىمەن جۇرگىزىلدى.
- جالدامالى پاتەردە ءارقايسىسىندا 8 سلوتى بار 5 sim-box قۇرىلعىسى انىقتالدى. وندا قازاقستاندىق ۇيالى بايلانىس وپەراتورلارىنىڭ sim كارتالارى ورناتىلعان. ولاردىڭ كومەگىمەن رەسپۋبليكا اۋماعىندا ينتەرنەت- الاياقتىق جاساۋ ءۇشىن قولدانىلاتىن ۆيرتۋالدى ابونەنتتىك نومىرلەر تىركەلگەن. سونىمەن قاتار 4 روۋتەر مەن قازاقستاندىق جانە شەتەلدىك بايلانىس وپەراتورلارىنىڭ 53 sim كارتاسى تاركىلەندى. ۇستالعاندار پوليسياعا جەتكىزىلدى. انىقتالعانداي، ولاردىڭ مىندەتىنە اپتا سايىن قۇرىلعىلارداعى sim كارتالاردى اۋىستىرۋ كىرگەن. قازىرگى ۋاقىتتا تەرگەۋ جۇرگىزىلۋدە، - دەدى ءىىم كيبەرقىلمىسقا قارسى ءىس- قيمىل دەپارتامەنتىنىڭ باستىعى جاندوس ءسۇيىنباي.
ءىىم كيبەرقىلمىسقا قارسى ءىس- قيمىل دەپارتامەنتى ۇيالى بايلانىس وپەراتورلارىمەن بىرلەسىپ، ينتەرنەت- الاياقتارمەن جانە ولاردىڭ سىبايلاستارىمەن بەلسەندى كۇرەستى جالعاستىرىپ كەلەدى.
جىل باسىنان بەرى 9 مىڭنان استام ءنومىر بۇعاتتالدى. ولار ارقىلى 200 مىڭ الاياقتىق قوڭىراۋ شالىنعان. كيبەرقىلمىسقا قارسى ءىس- قيمىل بولىنىستەرىنىڭ قىزمەتكەرلەرى 28 ينتەرنەت- الاياقتى، sim-box ستانتسيالارىنىڭ 3 «وپەراتورىن» ۇستاپ، 7 sim-box قۇرىلعىسى مەن ءتۇرلى ۇيالى وپەراتورلاردىڭ 285 sim كارتاسىن تاركىلەدى.
ايتا كەتەيىك، بۇعان دەيىن الماتىدا ەكى ەر ادامنان 190 sim كارتا مەن sim-box قۇرىلعىسى تاركىلەندى.