ەرلەر مەن ايەلدەر بالا اسىراپ العىسى كەلەتىندەردىڭ تىزىمىندە تەڭ دارەجەدە - كونستيتۋتسيالىق سوت
استانا. KAZINFORM - ق ر كونستيتۋتسيالىق سوتى «نەكە جانە وتباسى تۋرالى» كودەكستىڭ 91-بابى 2-تارماعىنىڭ 11) تارماقشاسىن كونستيتۋتسياعا سايكەس ەمەس دەپ تانىدى.
كودەكستىڭ اتالعان نورماسىنا سايكەس، اناسىنىڭ قايتىس بولۋىنا نەمەسە ونىڭ اتا-انا قۇقىقتارىنان ايىرىلۋىنا بايلانىستى بالانىڭ كەمىندە ءۇش جىل ءىس جۇزىندە تاربيەلەنۋ جاعدايلارىن قوسپاعاندا، تىركەلگەن نەكەدە تۇرماعان (ەرلى-زايىپتى بولماعان) ەر جىنىستى ادامدار بالا اسىراپ الا المايدى.
«كونستيتۋتسيالىق سوتقا جۇگىنگەن ازامات بۇل نورمانى كەمسىتۋشى جانە كونستيتۋتسيانىڭ ەشكىمدى جىنىسى بويىنشا قانداي دا ءبىر كەمسىتۋگە بولمايدى دەپ كورسەتىلگەن 14-بابىنا قايشى دەپ سانايدى. ول تىركەلگەن (زاڭدى) نەكەدە تۇرماعان ايەلدەر ءۇشىن مۇنداي تىيىم سالۋ جوق ەكەنىنە نازار اۋدارادى.
تەكسەرۋ ناتيجەلەرى بويىنشا كونستيتۋتسيالىق سوت تۇتاستاي العاندا زاڭ شىعارۋشىنىڭ بالا اسىراپ الۋ قۇقىعىنىڭ شارتتارى مەن شەكتەۋلەرىن بەلگىلەۋ جونىندەگى ءتاسىلىنىڭ ءوزى مەملەكەتتىڭ بالالىق شاقتى قورعاۋدىڭ كونستيتۋتسيالىق بەلگىلەنگەن مىندەتىنە جانە بالالاردىڭ مۇددەلەرىن بارىنشا جاقسى قامتاماسىز ەتۋدىڭ قابىلدانعان مىندەتتەمەلەرىنە سايكەس كەلەتىندىگىن، سونداي-اق بەلگىلى ءبىر ماقساتتاردا ادام مەن ازاماتتىڭ قۇقىقتارى مەن بوستاندىقتارىن زاڭدارمەن شەكتەۋ مۇمكىندىگى تۋرالى كونستيتۋتسيانىڭ 39-بابىنا سايكەس كەلەتىندىگىن اتاپ ءوتتى»، - دەپ جازىلعان حابارلامادا.
سونىمەن بىرگە، بالا اسىراپ العىسى كەلەتىن ادامدار ءۇشىن زاڭ شىعارۋشى بەلگىلەگەن شەكتەۋلەر زاڭدى تۇردە نەگىزدەلگەن ماقساتتارعا سايكەس كەلۋى جانە بالالاردىڭ قۇقىقتارى مەن مۇددەلەرىنە سۇيەنە وتىرىپ، ادىلدىك، پروپورتسيونالدىلىق جانە مولشەرلەستىك تالاپتارىنا ساي جاۋاپ بەرۋى كەرەك.
كونستيتۋتسيالىق سوت ءوز قۇقىقتارى مەن مۇددەلەرىن قورعاۋعا مۇقتاج بالانىڭ مۇددەلەرىنە سۇيەنىپ، نەكە مەن وتباسىن، انا بولۋدى، اكە بولۋدى جانە بالالىق شاقتى قورعاۋدىڭ كونستيتۋتسيالىق بەلگىلەنگەن مىندەتىن باسشىلىققا الۋ كەرەكتىگىن كورسەتتى. تيىسىنشە، زاڭنامالىق تەتىكتەر بالا مەن ايەلدىڭ، ەڭ الدىمەن، نەكەدە تۇرعان جانە وتباسى بار، بالانىڭ مۇددەلەرى مەن قامقورلىعىن جاقسى قامتاماسىز ەتۋ ماقساتتارىنا كوبىرەك جاۋاپ بەرەتىن ادام رەتىندە بالا اسىراپ الۋدى قولداۋعا باعىتتالۋى كەرەك.
وسىلايشا، بالالاردى جىنىسىنا قاراي اسىراپ العىسى كەلەتىن ادامدارعا تەڭ ەمەس كوزقاراسپەن بايلانىستى شەكتەۋ كونستيتۋتسيانىڭ 14-بابىنىڭ تالاپتارىنا سايكەس كەلمەيدى دەپ تابىلدى.
اۆتور
اسحات رايقۇل
