ەرلان سايروۆ ەڭ تومەنگى ايلىقتىڭ مولشەرىن كوتەرۋدى ۇسىندى

استانا. KAZINFORM - ءماجىلىس دەپۋتاتى ەرلان سايروۆ پرەمەر-ءمينيستردىڭ ورىنباسارى تامارا دۇيسەنوۆاعا جولداعان ساۋالىندا ەڭ تومەنگى ايلىقتى ينفلياتسياعا ساي يندەكستەۋدى ۇسىندى.

Ерлан Саиров
Фото: Виктор Федюнин/Kazinform

- ۇكىمەتتىڭ جاساپ جاتقان شارالارىنا قاراماستان حالقىمىزدىڭ ءال-اۋقاتى ارتپاي تۇر. ۇلتتىق ستاتيستيكا بيۋروسىنىڭ مالىمەتتەرىنە سۇيەنسەك، جان باسىنا شاققانداعى كىرىس 112-مىڭ تەڭگە بولىپ وتىر. ونىڭ 98 مىڭ تەڭگەسى تەك قانا ازىق-تۇلىك، كيىم-كەشەك، كوممۋنالدىق قىزمەتتى تولەۋگە كەتەدى. مىسالى، ۇلتتىق ستاتيستيكا بيۋروسىنىڭ دەرەكتەرى بويىنشا، كۇرىشتىڭ باعاسى 31,3 پايىزعا، جۇمىرتقا 16,9 پايىزعا، سارى ماي مەن ءسۇت ونىمدەرىنىڭ باعاسى 12 پايىزعا وسكەن. كارتوپ پەن ىرىمشىك ونىمدەرىنىڭ باعاسى ءبىر جىلدىڭ ىشىندە 35 پايىزعا وسكەن. تۇرعىن ءۇي-كوممۋنالدىق شارۋاشىلىققا كەلسەك، كوممۋنالدىق قىزمەتتەر ورتاشا العاندا 25 پايىزعا قىمباتتاعان، - دەدى ءماجىلىس دەپۋتاتى.

ونىڭ پايىمداۋىنشا، مۇنداي ازاماتتاردىڭ شىعىنىن ارتتىرىپ، كىرىستەرىن تومەندەتە بەرەدى.

- ەلىمىزدەگى ەڭ تومەنگى جالاقى 85 مىڭ تەڭگەدەن كوتەرىلگەن جوق. بۇل 1,8 ميلليون ادامنىڭ تۇرمىس دەڭگەيىنە قاتىستى. ەڭ تومەنگى جالاقىنى كوتەرۋ - ۇكىمەتتىڭ باستى مىندەتى، - دەدى ول.

ەرلان سايروۆ ۇكىمەتكە ەڭ تومەنگى ايلىقتى يندەكستەۋدى ۇسىندى.

- جۇمىسسىزدىقتان ساقتاندىرۋ سوماسىن ارتتىرۋ ارقىلى ەڭ تومەن جالاقى الاتىن ادامداردىڭ ساقتاندىرۋ جۇيەسىن جەتىلدىرۋ كەرەك. اكىمدەر وڭىرلىك اۋىل شارۋاشىلىق ونىمدەرىن جەرگىلىكتى نارىققا قاجەتتى مولشەردە جەتكىزىلۋىن قامتاماسىز ەتۋى قاجەت. اۋىل شارۋاشىلىق ونىمدەرىنە بەرىلەتىن مەملەكەتتىك تولەمدەردى ۋاقىتىلى ءارى قاجەتتى سومادا تولىق تولەنۋىن قامتاماسىز ەتۋ ماڭىزدى، - دەدى دەپۋتات.

ەسكە سالساق، ۇلتتىق بانك ءتوراعاسى تيمۋر سۇلەيمەنوۆ تە بىلتىر كوكتەمدە ەلدەگى ەڭ تومەنگى ايلىق كۇنكورىسكە جەتپەيتىنىن مويىنداعان ەدى.

سوڭعى جاڭالىقتار