ەرلان قوشانوۆ رەسەي فەدەراتسيا كەڭەسىنىڭ توراعاسىمەن قانداي كەلىسىم جاسالعانىن ايتتى

Ерлан Қошанов
Фото: Жаслан Жұмабеков

استانا. KAZINFORM – ق ر پارلامەنت ءماجىلىسىنىڭ ءتوراعاسى ەرلان قوشانوۆ رەسەي فەدەراتسياسىنا رەسمي ساپارى بارىسىندا قانداي ۋاعدالاستىق بولعانىن ايتتى.

ايتا كەتەيىك، جاقىندا ە. قوشانوۆ باستاعان دەپۋتاتتار دەلەگاتسياسى ماسكەۋدە فەدەرالدىق جينالىس مەملەكەتتىك دۋماسىنىڭ ءتوراعاسى ۆياچەسلاۆ ۆولودينمەن جانە فەدەرالدىق جينالىس فەدەراتسيا كەڭەسىنىڭ ءتوراعاسى ۆالەنتينا ماتۆيەنكومەن كەزدەستى.

بۇگىن ماجىلىستە بولعان باسپا ءسوز ءماسليحاتىندا تىلشىلەر ءماجىلىس ءتوراعاسىنان «رەسمي ساپار اياسىندا رەسەيلىك دەپۋتاتتاردىڭ قازاقستاننىڭ اۋماقتىق تۇتاستىعىنا قاتىستى قيسىنسىز پىكىرلەرىنە توسقاۋىل قويۋ تاقىرىبى قارالدى ما؟» دەپ سۇرادى.

ءوز كەزەگىندە ەرلان قوشانوۆ ماسكەۋدەگى كەزدەسۋلەر بارىسىندا وسى ماسەلە بويىنشا پىكىر الماسۋ بولعانىن ايتتى.

«بۇل تاقىرىپتا رەسەي فەدەرالدىق جينالىس فەدەراتسيا كەڭەسىنىڭ ءتوراعاسى ۆالەنتينا ماتۆيەنكومەن سويلەستىك. ەكى جاق وسى ماسەلە بويىنشا جۇمىس ىستەيمىز دەپ ۋاعدالاستىق»، - دەدى ق ر پارلامەنتى ءماجىلىسىنىڭ ءتوراعاسى.

ايتا كەتەيىك، بىرنەشە جىل بۇرىن ماجىلىسمەن ايگۇل قۇسپان ر ف دۋما دەپۋتاتىنىڭ ارانداتقىش مالىمدەمەسىنە جاۋاپ بەردى.

سونىمەن قاتار، 2022-جىلى بۇرىنعى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى رەسەيدىڭ كوممۋنيستىك پارتيا فراكسياسىنىڭ جەتەكشىسى گەننادي زيۋگانوۆتىڭ ايتقان سوزىنە قاتىستى پىكىر ءبىلدىردى.

2020-جىلى ءماجىلىس دەپۋتاتى رەسەيلىك دەپۋتاتتار - ۆياچەسلاۆ نيكونوۆ پەن ەۆگەني فەدوروۆتىڭ مالىمدەمەسىنە جاۋاپ بەردى.

مۇنىمەن قوسا، قازاقستان رەسپۋبليكاسىنىڭ سىرتقى ىستەر مينيسترلىگىنە رەسەي فەدەراتسياسىنىڭ ۋاقىتشا سەنىمدى وكىلى الەكساندر كوماروۆ شاقىرىلدى.

سوڭعى جاڭالىقتار