ەرلان قوشانوۆ ۇ ق ش ۇ الاڭىندا قازاقستاننىڭ جاڭا كونستيتۋتسياسىن تانىستىردى

بۇل تۋرالى ءماجىلىستىڭ باسپا ءسوز قىزمەتى ءمالىم ەتتى.

ۇ ق ش ۇ پارلامەنتتىك اسسامبلەياسى كەڭەسىنىڭ وتىرىسىندا ءسوز سويلەگەن ەرلان قوشانوۆ قاتىسۋشىلاردى ۇيىمنىڭ 20 جىلدىعىمەن قۇتتىقتادى. ول وسى ۋاقىتتا پارلامەنتتىك اسسامبلەيا ۇ ق ش ۇ ۇجىمدىق قاۋىپسىزدىك جۇيەسىنىڭ ماڭىزدى ەلەمەنتىنە اينالعانىن، مۇشە مەملەكەتتەر اراسىنداعى ءتيىمدى پارلامەنتتىك ءوزارا ءىس-ارەكەتتى قامتاماسىز ەتكەنىن اتاپ ءوتتى.

ءماجىلىس سپيكەرى قازىرگى جاھاندىق ساياسي تۇراقسىزدىق جاعدايىندا پارلامەنتتىك ديپلوماتيا بەيبىتشىلىك پەن جالپىعا ورتاق وركەندەۋ جولىنداعى ماڭىزدى بىرىكتىرۋشى تەتىككە اينالىپ كەلە جاتقانىنا نازار اۋداردى.

ەرلان قوشانوۆ ارىپتەستەرىن جالپى رەسپۋبليكالىق رەفەرەندۋمدا قازاقستاندىقتاردىڭ باسىم كوپشىلىگى قولداعان جاڭا كونستيتۋتسيانىڭ نەگىزگى ەرەجەلەرى تۋرالى حاباردار ەتتى.

- پرەزيدەنتتىكتىڭ العاشقى كۇندەرىنەن باستاپ قاسىم-جومارت كەمەل ۇلى توقايەۆ ماڭىزدى ساياسي رەفورمالارعا باستاماشى بولدى. جاڭا كونستيتۋتسيا ولاردىڭ لوگيكالىق ناتيجەسىنە اينالدى. مەملەكەت باسشىسىنىڭ باستاماسى بويىنشا، ادىلەتتى جانە پروگرەسسيۆتى قازاقستان قۇرۋ اتا زاڭنىڭ باستى ماقساتى رەتىندە بەكىتىلدى. ادامنىڭ مۇددەلەرىنە باعىتتالۋ پرينتسيپى جاڭا ءارى تەرەڭ مازمۇنمەن تولىقتى. ادام، ونىڭ قۇقىقتارى مەن بوستاندىقتارى مەملەكەتتىڭ باستى قۇندىلىعىنا اينالىپ وتىر. كونستيتۋتسيادا كۇشتى پرەزيدەنت، ىقپالدى پارلامەنت جانە ەسەپ بەرەتىن ۇكىمەت تەڭگەرىمى بەكىتىلدى. ءبىز قوس پالاتالى پارلامەنتتەن ءبىر پالاتالى پارلامەنتكە وتەمىز. وعان قۇرىلتاي اتاۋى بەرىلدى، ونىڭ مۇشەلەرى تەك پارتيالىق تىزىمدەر بويىنشا سايلانادى، - دەدى ءماجىلىس سپيكەرى.

ۇ ق ش ۇ پارلامەنتشىلەرى جاڭا ينستيتۋتتار - ۆيتسە-پرەزيدەنت پەن حالىق كەڭەسى قۇرىلعانى تۋرالى، سونداي-اق پرەزيدەنتتىك باسقارۋ نىسانى كونستيتۋتسيادا بيلىكتىڭ بارلىق تارماقتارى جۇمىسىنىڭ ۇزدىكسىزدىگىن، جۇيەلىلىگى مەن كەلىسىمدىلىگىن قامتاماسىز ەتۋدىڭ كەپىلى رەتىندە بەكىتىلگەنى تۋرالى حاباردار بولدى.

اسسامبلەيا جۇمىسىنا توقتالعان ءماجىلىس ءتوراعاسى ۇ ق ش ۇ- عا مۇشە مەملەكەتتەردىڭ ۇلتتىق زاڭنامالارىن ۇيلەستىرۋدى جاقىنداستىرۋ بويىنشا دەپۋتاتتاردىڭ جۇيەلى جانە جەمىستى جۇمىس اتقارعانىنا نازار اۋداردى. اسسامبلەيا قابىلداعان مودەلدىك زاڭداردىڭ اۋقىمى وتە كەڭ، وندا ۇجىمدىق قاۋىپسىزدىكتەن باستاپ تەرروريزمگە، ەكسترەميزمگە، زاڭسىز ەسىرتكى اينالىمىنا جانە ترانسۇلتتىق قىلمىسقا قارسى ءىس-ارەكەتكە دەيىن قامتىلعان.

وتىرىس بارىسىندا دەلەگاتتار ۇ ق ش ۇ ۇجىمدىق قاۋىپسىزدىك كەڭەسىنىڭ قاراشا ايىنداعى سەسسياسىنىڭ شەشىمدەرىن، ۇجىمدىق قاۋىپسىزدىكتىڭ سىن-قاتەرلەرى مەن قاۋىپتەرىنە قارسى ءىس-ارەكەت جونىندەگى شارالاردى، سونداي-اق ۇ ق ش ۇ- عا مۇشە مەملەكەتتەردىڭ ۇلتتىق زاڭناماسىن جاقىنداستىرۋ جانە ۇيلەستىرۋ جونىندەگى ۇجىمدىق قاۋىپسىزدىك تۋرالى ۇ ق ش ۇ پارلامەنتتىك اسسامبلەياسى قىزمەتىنىڭ 2026-2030-جىلدارعا ارنالعان باعدارلاماسىن ىسكە اسىرۋ بارىسىن تالقىلادى.

ەسكە سالا كەتەيىك، جاقىندا تاالاتبەك ماسادىكوۆ قاسىم-جومارت توقايەۆقا ۇ ق ش ۇ باس حاتشىسى لاۋازىمىنداعى جوسپارىن تانىستىرعان بولاتىن.