ەرلان قوشانوۆ: ۇلتتىق قور قاراجاتىن پايدالانۋ پراكتيكاسىن دوعارۋ قاجەت
استانا. KAZINFORM - ءماجىلىس سپيكەرى ەرلان قوشانوۆ ۇكىمەتتىڭ ۇلتتىق قور قاراجاتىن جۇمساۋىن سىنعا الدى.
«سوڭعى جىلدارى ۇكىمەت ۇلتتىق قوردان ترانسفەرتتەردى ۇلعايتىپ، بيۋجەتتى تەڭگەرىمدى كۇيدە ۇستاي الماي كەلەدى. 2025-جىلى ۇلتتىق قوردان كەپىلدەندىرىلگەن جانە نىسانالى ترانسفەرتتەر كولەمى 5,3 تريلليون تەڭگەنى قۇراپ وتىر. بۇل تۋرالى دا بۇگىن ايتىلدى. الايدا، مەملەكەت باسشىسىنىڭ ترانسفەرتتەردى قىسقارتۋ قاجەتتىگى تۋرالى بىرنەشە مارتە بەرگەن تاپسىرماسى بار. قوردان ءىرى كولەمدە قاراجات شىعارۋ، ونىڭ اكتيۆتەرىن 2029-جىلعا قاراي 100 ميلليارد ا ق ش دوللارعا جەتكىزۋدە تاۋەكەل تۋدىرادى»، - دەدى ەرلان قوشانوۆ ءماجىلىستىڭ جالپى وتىرىسىندا 2025-2027-جىلدارعا ارنالعان رەسپۋبليكالىق بيۋجەتتى تالقىلاۋدى قورىتىندىلاي وتىرىپ.
وسى ورايدا ءماجىلىس سپيكەرى ۇلتتىق قور - بولاشاق ۇرپاققا ارنالعان قارجى مۇراسى ەكەنىن ەسكە سالدى.
«ۇلتتىق قور قاراجاتىن اعىمداعى قاجەتتىلىكتەرگە پايدالانۋ پراكتيكاسىن دوعارۋ قاجەت. بۇگىندە جەتى ميلليونعا جۋىق بالا ۇلتتىق قوردان تولەم الادى، بۇكىل ەل قور قاراجاتىنىڭ جۇمسالۋىن ءجىتى قاداعالاپ وتىر»، - دەپ تولىقتىردى ە. قوشانوۆ.
بۇعان دەيىن ەرلان قوشانوۆ بيۋجەت كىرىسىنىڭ تومەندەۋى جىلدار بويى جالعاسىپ كەلە جاتقانىن ايتىپ، ۇكىمەتكە ءبىرقاتار مىندەت جۇكتەدى.
