ەرلان قوشانوۆ ءاليحان سمايىلوۆ ۇكىمەتىنىڭ جۇمىسىنا باعا بەردى
استانا. KAZINFORM - ءماجىلىس ءتوراعاسى ەرلان قوشانوۆ بۇرىنعى ۇكىمەتتىڭ جۇمىسىنا باعا بەرىپ، جاڭا پرەمەر-مينيستر قىزمەتىنە نەلىكتەن ولجاس بەكتەنوۆتى تاڭداعاندارىن ءتۇسىندىردى.
«بۇرىنعى ۇكىمەت تۋرالى ايتار بولساق، وعان مەملەكەت باسشىسى ءوز باعاسىن بەردى. مەن بۇل ۇكىمەتتىڭ جۇمىسىندا ۇلكەن ساتسىزدىك بولدى دەپ ايتا المايمىن، وعان ماكروەكونوميكالىق كورسەتكىشتەر دالەل. ەكونوميكالىق ءوسىم %5 دان استى، ينفلياتسيا ەكى ەسە تومەندەدى. ەلگە ينۆەستيتسيالار دا جاقسى كولەمدە كەلدى. سونىمەن بىرگە، ارينە، جىلدار بويى قوردالانعان جىلۋ ەنەرگەتيكاسى، جالپى ەنەرگەتيكا، ينفراقۇرىلىم، نەسيەگە باتۋ سەكىلدى شەشىلمەگەن ماسەلەلەر بولدى. ءبىراق ءبىز بۇل جاۋاپكەرشىلىكتى، ساياسي جاۋاپكەرشىلىكتى سول ۇكىمەتپەن بولىسەمىز»، - دەدى ەرلان قوشانوۆ ءماجىلىس كۋلۋارىندا.
سونىمەن بىرگە، ە. قوشانوۆ ءماجىلىستىڭ جاڭا ۇكىمەتكە سەنىم بىلدىرگەنىن ايتتى.
«ءبىز قازىرگى پرەمەر-ءمينيستردىڭ كانديداتۋراسىن ۇسىندىق، ويتكەنى پرەزيدەنت جاڭا سەرپىن قاجەت ەكەنىن، العا جاڭا مىندەتتەر قويىلعانىن ايتتى. 2029-جىلعا قاراي ج ءى ءو- نى ەكى ەسەگە ارتتىرۋ قاجەت، ول ءۇشىن ەكونوميكانىڭ جىل سايىنعى ءوسىمىن كەمىندە %6 قامتاماسىز ەتۋىمىز كەرەك. كاپيتالدى قايتارۋ بويىنشا ۇلكەن مىندەتتەر تۇر. سوندىقتان جاڭا ادامدار قاجەت بولدى، سوندىقتان ءبىز بەكتەنوۆتىڭ كانديداتۋراسى ەڭ قولايلى دەپ سانادىق»، - دەپ ءتۇسىندىردى ەرلان قوشانوۆ.
بۇعان دەيىن ءماجىلىس ءتوراعاسى اتىشۋلى ق. بيشىمبايەۆتىڭ سوت پروتسەسى تۋرالى تىلشىلەر سۇراعىنا جاۋاپ بەرگەن ەدى.
