ەرلان قارين روبوت تەحنيكاسىنان الەم چەمپيونى بولعان وقۋشىلارمەن كەزدەستى

استانا. KAZINFORM - ەرلان قارين روبوتتى تەحنيكادان الەمنىڭ ءۇش دۇركىن جەڭىمپازى اتانعان مەكتەپ وقۋشىلارىمەن جۇزدەستى، دەپ حابارلايدى اقوردانىڭ باسپا ءسوز قىزمەتى.

كەزدەسۋگە قازاقستان كومانداسىنىڭ مۇشەلەرى، الماتى قالاسىنداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ وقۋشىلارى ەرداۋلەت تۇرگەنبايەۆ، ءالفيا بايجاقىپ، نۇرجان كوكەيەۆ، دوسجان دايران جانە قادىلبەك داستان، سونداي-اق ولاردىڭ ۇستازدارى اسىلبەك مىرزاحمەتوۆ پەن نۇرداۋلەت دوسماعامبەت قاتىستى.

مەملەكەتتىك كەڭەسشى دارىندى وقۋشىلار مەن ولاردىڭ ۇستازدارىن جاقىندا گرەكيادا روبوتتى تەحنيكادان وتكەن FIRST Global Challenge دەپ اتالاتىن اۋقىمدى چەمپيوناتتاعى كەزەكتى جەڭىسىمەن قۇتتىقتادى.

وقۋشىلار مەن ۇستازدار چەمپيوناتقا دايىندىق بارىسى جانە ونى وتكىزۋدىڭ ەرەكشەلىكتەرىنە توقتالىپ، الداعى جوسپارلارىمەن ءبولىستى.

FIRST Global Challenge    ءارتۇرلى مەملەكەتتە 2017-جىلدان  بەرى وتكىزىلىپ كەلە جاتقان روبوتتى تەحنيكادان وليمپيادالىق ۇلگىدەگى الەم چەمپيوناتى. قازاقستاننىڭ قۇراما كومانداسى 2022-جىلى جەنيەۆادا جانە 2023-جىلى سينگاپۋردە وتكەن جارىستا توپ جاردى.

سونىمەن بىرگە ءبىزدىڭ كوماندانىڭ قۇرامى ءار باسەكەدە تولىق جاڭارتىلىپ، ۇلتتىق كەزەڭنىڭ جەڭىمپازدارىنان جاساقتالدى.

بيىل وقۋشىلارىمىز 190 ەلدىڭ مىقتىلارى باق سىناعان ءدۇبىرلى دودادا قاتارىنان ءۇشىنشى رەت جەڭىمپاز اتاندى.