ەرلان قارين رەسپۋبليكا كۇنى نەلىكتەن باستى ۇلتتىق مەرەكەمىز ەكەنىن ايتتى

  25-قازان — رەسپۋبليكا كۇنى نەلىكتەن ەلىمىزدىڭ باستى ۇلتتىق مەرەكەسى؟ بۇل سۇراققا ءوزىنىڭ تەلەگرام ارناسىندا قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين جاۋاپ بەردى، دەپ جازادى Kazinform.

مەملەكەتتىك كەڭەسشى دەكلاراتسيادا قازاقستاننىڭ مەملەكەتتىك ەگەمەندىگى، قازاقستاننىڭ تاۋەلسىز مەملەكەت رەتىندەگى ساياسي- قۇقىقتىق نەگىزدەرى جاريالاندى:

— 1990 -جىلدىڭ ءدال وسى كۇنى ەلىمىزدىڭ جوعارعى كەڭەسىنىڭ وتىرىسىندا 6 ساعاتقا سوزىلعان قىزۋ تالقىلاۋلاردان كەيىن رەسپۋبليكانىڭ مەملەكەتتىك ەگەمەندىگى تۋرالى دەكلاراتسيا قابىلداندى.

جوبانىڭ ءوزىن دەپۋتاتتار، عالىمدار، قوعام قايراتكەرلەرىنەن قۇرالعان توپ بەس اي بويى ازىرلەدى.

وسىلايشا قازاقستان تاريحىندا تۇڭعىش رەت مەملەكەتتىك قۇجات بەلسەندى قوعامدىق تالقىلاۋدان ءوتتى.

العاش رەت ەلىمىزدىڭ ەگەمەندىك قۇقىقتارى بەكىتىلدى:

- رەسپۋبليكانىڭ شەكارا اۋماقتارىنىڭ بولىنبەيتىندىگى مەن وعان قول سۇقپاۋ قاعيداتتارى؛

- رەسپۋبليكا كونستيتۋتسياسى مەن زاڭدارىنىڭ ۇستەمدىگى؛

- رەسپۋبليكانىڭ ازاماتتىق ينستيتۋتى؛

- رەسپۋبليكانىڭ مەملەكەتتىك بيلىگىنە ۇستەمدىكتى، دەربەستىكتى، ىشكى جانە سىرتقى ساياساتتاعى وكىلەتتىكتەردىڭ تولىقتىعىن بەكىتۋ؛

- بارلىق ۇلتتىق بايلىقتار رەسپۋبليكانىڭ ايرىقشا مەنشىگى بولىپ جاريالاندى (جەر جانە ونىڭ جەر قويناۋى، سۋ، اۋە كەڭىستىگى، وسىمدىكتەر مەن جانۋارلار دۇنيەسى، باسقا دا تابيعي رەسۋرستار، حالىقتىڭ مادەني جانە تاريحي قۇندىلىقتارى، ەكونوميكالىق، عىلىمي، تەحنيكالىق الەۋەت) ؛

- رەسپۋبليكانىڭ حالىقارالىق قاتىناستاردىڭ دەربەس سۋبەكتىسى رەتىندە ارەكەت ەتۋ، سىرتقى ساياسات ماسەلەلەرىن دەربەس شەشۋ قۇقىعى.

وسىلايشا، 1990 -جىلى 25-قازاندا تاۋەلسىزدىگىمىزدى الۋدىڭ العاشقى قادامى جاسالدى.

رەسپۋبليكانىڭ ەگەمەندىگى تۋرالى دەكلاراتسيا - تاريحتاعى تۇڭعىش كونستيتۋتسيالىق قۇجات، قازىرگى قازاقستان مەملەكەتتىلىگىنىڭ نەگىزى.

ءبىر جىلدان كەيىن 1991 -جىلعى 16-جەلتوقسانداعى دەكلاراتسيا قاعيداتتارى نەگىزىندە «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق زاڭ ەلىمىزدىڭ ەگەمەن جانە تاۋەلسىز مەملەكەت مارتەبەسىن تۇپكىلىكتى بەكىتتى.

سوندىقتان رەسپۋبليكا كۇنى - ەلىمىزدىڭ شىنايى تاۋەلسىزدىككە جەتۋ جولىنداعى باتىل قادامىنىڭ باستى بەلگىسى.

1995-2001 -جىلدارى بۇل كۇن ۇلتتىق مەرەكە رەتىندە اتاپ ءوتىلدى. ال وتكەن جىلى مەملەكەت باسشىسى بۇل مەرەكەنى قالپىنا كەلتىرىپ، ۇلتتىق مەرەكە مارتەبەسىن قايتارۋ تۋرالى شەشىم قابىلدادى.

اۆتور

ەركەجان سماعۇلوۆا