ەرلان قارين قازاقستاننىڭ ستراتەگيالىق زەرتتەۋلەر ينستيتۋتى عىلىمي كەڭەسىنىڭ وتىرىسىنا قاتىستى

  بۇگىن مەملەكەتتىك كەڭەسشى ەرلان قارين قازاقستان رەسپۋبليكاسى پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنا (ق س ز ي) بارىپ، عىلىمي كەڭەستىڭ وتىرىسىنا قاتىستى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.

جيىندا ينستيتۋتتىڭ بيىلعى جىلعا جوسپارلانعان تالداۋ جۇمىسىنىڭ نەگىزگى باعىتتارى مەن ماڭىزدى ءىس-شارالارى تالقىلاندى. اتاپ ايتقاندا، ق س ز ي ەل دامۋىنىڭ ىشكى ساياسي ۇدەرىستەرى مەن ەكونوميكالىق ۇردىستەرىن زەرتتەۋگە، سونداي-اق سىرتقى ساياسي احۋالدى باعامداۋعا باسا ءمان بەرەدى.

ءوز كەزەگىندە مەملەكەتتىك كەڭەسشى ينستيتۋتتىڭ الداعى ۋاقىتتا اتقاراتىن مىندەتتەرىنە توقتالىپ، پرەزيدەنت قاسىم-جومارت توقايەۆ قاڭتار ايىنىڭ باسىندا «egemen Qazaqstan» گازەتىنە بەرگەن سۇحباتىندا مەملەكەتتىك ساياساتتىڭ نەگىزگى باعىت-باعدارىن ايقىنداعانىن اتاپ ءوتتى. سوندىقتان قازاقستاننىڭ ستراتەگيالىق زەرتتەۋلەر ينستيتۋتى باستى تالداۋ ورتالىعى رەتىندە جۇزەگە اسىرىلىپ جاتقان مەملەكەتتىك ساياساتتى ساراپتامالىق-تالدامالىق تۇرعىدان قامتاماسىز ەتۋ ىسىنە بەلسەنە اتسالىسۋى كەرەك.

بۇدان بولەك، ەرلان قارين ينستيتۋتتىڭ ايماقتارداعى ساراپشىلار قاۋىمداستىعىمەن قارىم- قاتىناستى نىعايتۋعا، جاس ساراپشىلاردى قولداۋعا، حالىقارالىق ىنتىماقتاستىقتى تەرەڭدەتۋگە، سونىڭ ىشىندە «Central Asia’s Affairs» جۋرنالىن بىرلەسىپ ازىرلەۋگە قاتىستى جوسپارلارى مەن باستامالارىنا وڭ باعا بەردى.