ەرلان قارين باستاعان قازاقستاندىق دەلەگاتسيا قىتايدا وتكەن ءىس-شارالارعا قاتىستى
استانا. KAZINFORM - مەديا جانە تالداۋ قۇرىلىمدارى وكىلدەرىنەن جاساقتالعان قازاقستاننىڭ دەلەگاتسياسى بەيجىڭدە ءبىرقاتار ءىس-شاراعا قاتىستى. دەلەگاتسيانى مەملەكەتتىك كەڭەسشى باستاپ باردى.
ەرلان قارين قىتايدىڭ حالىقتىق ساياسي كونسۋلتاتيۆتىك كەڭەسى بۇكىلقىتايلىق كوميتەتىنىڭ ءتوراعاسى ۆان حۋنينمەن جانە قىتاي كوممۋنيستىك پارتياسى ورتالىق كوميتەتىنىڭ ناسيحات ءبولىمىنىڭ مەڭگەرۋشىسى لي شۋلەيمەن كەزدەستى.
باسقوسۋدا تاراپتار ءوز ەلدەرىندە اتقارىلىپ جاتقان الەۋمەتتىك- ەكونوميكالىق جانە مادەني-گۋمانيتارلىق سالاداعى جۇمىستىڭ نەگىزگى باعىتتارىمەن تانىستىردى. ەكى ەلدە جۇرگىزىلىپ جاتقان رەفورمالاردى تالقىلادى. سونداي-اق قازاقستاندا وتەتىن «ورتالىق ازيا-قىتاي» ەكىنشى سامميتىنە وراي بىرلەسكەن ءىس-شارالار ۇيىمداستىرۋعا ۋاعدالاستى.
ەرلان قارين قىتايدىڭ قوعامدىق عىلىمدار اكادەمياسىنىڭ پرەزيدەنتى گاو سيانمەن جۇزدەستى. سونىمەن قاتار قازاقستان مەن قىتايدىڭ تالداۋ ورتالىقتارىنىڭ العاشقى فورۋمىندا ءسوز سويلەدى.
فورۋم اياسىندا قازاقستاننىڭ ستراتەگيالىق زەرتتەۋلەر ينستيتۋتى مەن قىتايدىڭ قوعامدىق عىلىمدار اكادەمياسى ءوزارا تۇسىنىستىك تۋرالى مەموراندۋمعا قول قويدى. سونداي-اق ەكى ەلدىڭ تالداۋ ورتالىقتارىنىڭ ىنتىماقتاستىعىن ودان ءارى دامىتۋعا ارنالعان جۇمىس سەسسياسى ءوتتى.
ساپار اياسىندا قازاقستاننىڭ مەملەكەتتىك تەلەكومپانيالارىنىڭ باسشىلارى قىتايدىڭ اسا ءىرى «China Media Group» مەديا كورپوراتسياسىنىڭ قىزمەتىمەن تانىستى. كەزدەسۋ بارىسىندا ولار قىتايلىق ارىپتەستەرمەن اقپارات سالاسىنداعى ىقپالداستىقتى دامىتۋ جانە بىرلەسكەن جوبالاردى جۇزەگە اسىرۋ ماسەلەلەرىن تالقىلادى.
سونىمەن بىرگە مەملەكەتتىك كەڭەسشى قىتاي حالىق ۋنيۆەرسيتەتىنىڭ پروفەسسورلىق-وقىتۋشىلىق ۇجىمىنا جانە ستۋدەنتتەرىنە ءدارىس وتكىزدى. ءدارىس بارىسىندا پرەزيدەنت قاسىم-جومارت توقايەۆتىڭ باسشىلىعىمەن جۇزەگە اسىرىلىپ جاتقان رەفورمالار تۋرالى جان-جاقتى مالىمەت بەرىلدى.
مەملەكەتتىك كەڭەسشى كەزدەسۋلەردىڭ قورىتىندىسى بويىنشا اۋقىمدى ءىس-شارالاردى ۇيىمداستىرعانى ءۇشىن قىتايلىق ارىپتەستەرىنە العىسىن ءبىلدىردى. ەكى ەل باسشىلارىنىڭ ارقاسىندا قازاقستان مەن قىتاي اراسىنداعى قارىم-قاتىناس جان-جاقتى ماڭگىلىك ستراتەگيالىق ارىپتەستىك دەڭگەيىنە كوتەرىلگەنىن اتاپ ءوتتى.
