ەرلان قارين: ايەلدەر مەن بالالاردىڭ قۇقىعىن قورعاۋ - مەملەكەتتىك ساياساتتاعى باسىمدىقتىڭ ءبىرى
استانا. KAZINFORM - ايەلدەر مەن بالالاردىڭ ىرگەلى قۇقىقتارىن قورعاۋ - مەملەكەتتىك ساياساتتاعى باسىمدىقتىڭ ءبىرى. بۇل تۋرالى قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين تەلەگرام ارناسىندا «ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى» زاڭ تۋرالى پىكىرىندە جازدى.
«بۇگىن سەنات «ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى» زاڭدى ماقۇلدادى.
مەملەكەت باسشىسى 2023 -جىلعى جولداۋدا تۇرمىستىق زورلىق- زومبىلىق ءۇشىن جاۋاپكەرشىلىكتى كۇشەيتۋدى تاپسىرعان بولاتىن. كوپ ۇزاماي ءماجىلىس دەپۋتاتتارى جاڭا قۇجاتتى ازىرلەۋگە كىرىستى. بۇل جۇمىسقا بالا قۇقىقتارى جونىندەگى ۋاكىل دينارا زاكيەۆا، قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ، سونداي-اق ۇلتتىق قۇرىلتايدىڭ مۇشەلەرى بەلسەنە اتسالىستى.
تۇرمىستىق زورلىق-زومبىلىقتىڭ قىلمىس دەپ تانىلۋى، بالالارعا قاتىستى زورلىق-زومبىلىقتىڭ بارلىق تۇرلەرى ءۇشىن جازانىڭ كۇشەيتىلۋى جانە وتباسىنداعى زورلىق-زومبىلىقتىڭ الدىن الۋعا ارنالعان ءتۇرلى شارالاردىڭ بەلگىلەنۋى زاڭنىڭ نەگىزگى جاڭاشىلدىعى دەپ اتاۋعا بولادى.
ايەلدەر مەن بالالاردىڭ ىرگەلى قۇقىقتارىن قورعاۋ - مەملەكەتتىك ساياساتتاعى باسىمدىقتىڭ ءبىرى. بۇل ماسەلە قاشان دا مەملەكەت باسشىسىنىڭ باستى نازارىندا»، - دەگەن مەملەكەتتىك كەڭەسشى.
ايتا كەتەيىك، پرەزيدەنت ۇلتتىق قۇرىلتايدىڭ ءۇشىنشى وتىرىسىندا تۇرمىستىق زورلىق-زومبىلىقتى ىمىراسىز كۇرەس جۇرگىزۋدى قاجەت ەتەتىن الەۋمەتتىك كەسەلدىڭ ءبىرى رەتىندە اتاپ وتكەن بولاتىن.
