ەرلان قارين پرەزيدەنت جولداۋىنداعى باستامالاردى زاڭنامالىق قولداۋعا باسىمدىق بەردى
استانا. KAZINFORM - ۆيتسە-پرەزيدەنت ەرلان قارين قۇرىلتايداعى پارتيا فراكسيالارىنىڭ جەتەكشىلەرىمەن كەزدەسىپ، پرەزيدەنت جولداۋىنداعى ستراتەگيالىق باستامالاردى زاڭنامالىق تۇرعىدان قامتاماسىز ەتۋ ماسەلەلەرىن تالقىلادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
ەرلان قارين پرەزيدەنت سويلەگەن سوزىندە كەلەر ۇرپاقتىڭ مۇددەسى ءۇشىن جۇزەگە اسىرىلاتىن جۇيەلى وزگەرىستەرگە باسا نازار اۋدارعانىن اتاپ ءوتتى. «حالىقتىق قۇرىلىس» مىندەتتەرى حالىقتىق سيفرلىق ەكونوميكانى دامىتۋمەن تىعىز ساباقتاستىرىلىپ، جولداۋدىڭ ءون بويىنان كورىنىس تاپتى. مەملەكەت كۇش-جىگەرىن بۇكىل ازاماتتىق ينفراقۇرىلىمدى جاڭعىرتۋدىڭ ىرگەلى ماسەلەلەرىنە شوعىرلاندىرىپ وتىر.
ۆيتسە-پرەزيدەنتتىڭ ايتۋىنشا، مەملەكەت قوردالانعان جۇيەلى پروبلەمالاردى بىرتىندەپ شەشىپ، بولاشاقتاعى دامۋدىڭ بەرىك نەگىزىن قالاۋدا.
- پرەزيدەنت جولداۋدا ستراتەگيالىق ماڭىزى بار جاڭا باستامالاردى كوتەردى. ولار قۇرىلتاي تاراپىنان ساپالى زاڭنامالىق قامتاماسىز ەتۋدى تالاپ ەتەدى. وسى باعىتتا پارتيا فراكسيالارىمەن بىرلەسىپ، ءتيىمدى جۇمىس ىستەۋگە دايىنبىز، - دەدى ەرلان قارين.
پارتيا فراكسيالارىنىڭ جەتەكشىلەرى جولداۋدا كوتەرىلگەن باستامالاردى قولداپ، اشىق ءارى سىندارلى ىنتىماقتاستىققا جانە بىرلەسكەن جۇمىسقا دايىن ەكەنىن مالىمدەدى.
كەزدەسۋگە «ادىلەت» پارتياسى فراكسياسىنىڭ جەتەكشىسى ەربول ادايەۆ، «اۋىل» پارتياسى فراكسياسىنىڭ جەتەكشىسى قايرات ايتۋعانوۆ، «Respublica» پارتياسى فراكسياسىنىڭ جەتەكشىسى ايداربەك قوجانازاروۆ، «اق جول» پارتياسى فراكسياسىنىڭ جەتەكشىسى دانيا ەسپايەۆا، جالپىۇلتتىق سوتسيال- دەموكراتيالىق پارتيا فراكسياسىنىڭ جەتەكشىسى اسحات راحىمجانوۆ، سونداي-اق پرەزيدەنتتىڭ قۇرىلتايداعى وكىلدىگىنىڭ باسشىسى مۇرات قايىربەك قاتىستى.
