ەرلان قارين: ءتىل نورمالارىنا قاتىستى ماسەلەمەن ەڭ الدىمەن عالىمدار مەن سالا ماماندارى اينالىسۋعا ءتيىس
استانا. KAZINFORM - ۆيتسە-پرەزيدەنت ەرلان قارين مەملەكەت باسشىسى قاسىم-جومارت توقايەۆتىڭ حالىقارالىق «قازاق ءتىلى» قوعامىنىڭ X قۇرىلتايىندا بەرگەن تاپسىرمالارىن جۇزەگە اسىرۋ ماقساتىندا ءتىل عالىمدارىمەن جانە سالا ساراپشىلارىمەن كەزدەسىپ، ءتىل نورمالارىنا قاتىستى ماسەلەمەن تەك عالىمدار مەن سالا ماماندارى عانا اينالىسۋعا ءتيىس ەكەنىن مالىمدەدى.
- قازاق ءتىلىنىڭ دامۋىنا قاتىستى ماسەلەلەر ەڭ الدىمەن عالىمدار مەن ءتىل ماماندارىنىڭ اراسىندا پىسىقتالۋى كەرەك. اۋەلى عالىمداردىڭ تاجىريبەسى مەن ءبىلىمى، وسى سالاداعى كاسىبي قاۋىمداستىقتىڭ ساراپتاماسى بولۋعا ءتيىس. ءاربىر شەشىم عىلىمي دالەلگە، ءتىلدىڭ ىشكى زاڭدىلىقتارىنا جانە قوعامنىڭ ناقتى قاجەتتىلىكتەرىنە سۇيەنۋى شارت، - دەدى ەرلان قارين.
ەسكە سالا كەتەيىك، ءبىر اپتا بۇرىن مەملەكەت باسشىسى «قازاق ءتىلى» قوعامىنىڭ قۇرىلتايىنا قاتىسىپ، جۇرتشىلىققا باعدارلامالىق سيپاتتاعى ءسوزىن ارناعان بولاتىن. سونداي-اق، مەملەكەتتىك ءتىلدىڭ وركەندەۋىنە قاتىستى ءوزىنىڭ تۇجىرىمدامالىق ويلارىمەن ءبولىستى. ءبىرقاتار وزەكتى ماسەلەگە نازار اۋدارىپ، ناقتى تاپسىرمالار بەردى. اتاپ ايتقاندا، پرەزيدەنت قازاق ءتىلىنىڭ ەملەسىن جانە ەرەجەسىن جۇيەلەۋ، سوزدىكتەردى جاڭارتۋ، قولدانىستاعى سوزدەر مەن ۇعىمداردىڭ بىرىزدىلىگىن رەتتەۋ، سوزدىك قورىمىزدى سيفرلىق فورماتقا كوشىرۋ سەكىلدى اسا ماڭىزدى ماسەلەلەرگە كەڭىنەن توقتالدى.
مەملەكەت باسشىسىنىڭ وسى تاپسىرمالارىن جۇزەگە اسىرۋ ماقساتىندا ساراپشىلار توبى قۇرىلادى. ونىڭ قۇرامىنا ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ قىزمەتكەرلەرى، جوعارى وقۋ ورىندارىنىڭ بىلىكتى ءتىل ماماندارى، عالىمدار، ساراپشىلار IT سالاسىنىڭ وكىلدەرى ەنبەك.
ايتا كەتەيىك، بۇعان دەيىن ەرلان قارين ءال-فارابي، اباي جانە ياساۋي مۇراسىن ءبىلىم بەرۋ جۇيەسىنە ەنگىزۋ قاجەتتىگىن ايتقان ەدى.