رەكورد: قازاقستان ەلەكتروليز زاۋىتى ءتورت ميلليون توننا «قاناتتى» مەتال شىعاردى
پاۆلودار. KAZINFORM - بۇل رەكوردقا مەتاللۋرگتەر كاسىپورىن ىسكە قوسىلىپ، العاشقى اليۋميني شىعارىلعاننان بەرى 17 جىل 2 اي دەگەندە قول جەتكىزىپ وتىر.
پاۆلودارداعى قازاقستان ەلەكتروليز زاۋىتى (ق ە ز) «قاناتتى» مەتالل ءوندىرىسىن باستاعاننان بەرى باستاپقى اليۋمينيدىڭ مەرەيلى ءتورت ميلليوندىق تونناسىن ءوندىردى.
- ءتورت ميلليونىنشى توننا ءونىمدى شىعارۋ - كاسىپورنىمىزدىڭ جىلناماسىنداعى ەرەكشە وقيعا. بۇل مەرەيلى مەجە - ءبىزدىڭ بارلىق قىزمەتكەرىمىزدىڭ ەڭبەگى، ولاردىڭ ءارقايسىسى وندىرىسكە ءوز ۇلەسىن قوسىپ ءجۇر. ءبىزدىڭ ۇجىمنىڭ ءاربىر مۇشەسىنىڭ ارقاسىندا وسى جىلدار ىشىندە ءوندىرىس تابىستى دامىپ، ءتيىمدى بولا ءتۇستى. قازىر كاسىپورىندا ءوندىرىس داستۇرلەرىن لايىقتى جالعاستىرىپ، جاڭا جەتىستىكتەرگە قول جەتكىزىپ جۇرگەن 2 مىڭنان استام قىزمەتكەر جۇمىس ىستەپ جاتىر، - دەيدى «قازاقستان ەلەكتروليز زاۋىتى» ا ق ءوندىرىس جونىندەگى ديرەكتورى مۇرات جۇمابايەۆ.
مەتاللۋرگتەر ءۇشىن العاشقىدا ءتورت ميلليون توننا اليۋمينيدى ەلەستەتۋدىڭ ءوزى عاجايىپقا تەڭ ەدى. ەگەر 4 ميلليون پاكەتتى ءبىر قاتارعا قويساڭىز، پاۆلوداردان ماسكەۋگە دەيىنگى ارالىققا جول سالۋعا بولار ەدى. ال ەگەر مۇنداي كولەمدى تەمىرجولمەن تاسىمالدار بولسا، وندا 65 مىڭ ۆاگوننان تۇراتىن قۇرام قاجەت بولادى.
بىلتىر قازاقستاندا اليۋميني ەكسپورتى 5 ەسەگە جۋىق وسكەنىن جازعانبىز.
اۆتور
مۇرات اياعان
