رەكتورعا سالەم ايتامىز - مينيسترلىك شىمكەنتتەگى ۋنيۆەرسيتەتتى تەكسەرمەكشى

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى اقپاراتتىق قاۋىپسىزدىك كوميتەتىنىڭ ءتوراعاسى رۋسلان ءابدىقالىقوۆ شىمكەنت ۋنيۆەرسيتەتىندەگى ستۋدەنتتەردىڭ جەكە دەرەگىنىڭ ۇرلانۋى جونىندە پىكىر ءبىلدىردى.

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا كوميتەت باسشىسىنا 2GIS، «ياندەكس ەدا»، Fonbet پلاتفورمالارىنان قازاقستاندىقتاردىڭ جەكە دەرەكتەرى قالاي قولدى بولعانى تۋرالى سۇراق قويىلدى.

«اقپاراتتا ايتىلعان «قازاقستانداعى جەتەكشى بانك» 2021 -جىلى جابىلىپ قالعان بانك بولىپ شىقتى. ءبىز قارجى نارىعىن رەتتەۋ جانە دامىتۋ اگەنتتىگىنە حابارلاستىق. ولار دا وسى مالىمەتتى راستادى. ول بانك قازىر زاڭدى تۇلعا رەتىندە جوق بولعاندىقتان ۇيىمنىڭ دەرەكتەرى ۇرلانعان-ۇرلانباعانىن تەكسەرە المايمىز. شىمكەنتتەگى ۋنيۆەرسيتەتتەردىڭ بىرىندەگى ستۋدەنتتەردىڭ جەكە دەرەگىنىڭ ۇرلانۋىنا كەلسەك، ءبىز مەملەكەتتىك تەحنيكالىق قىزمەتتەن رەسمي شاعىم الدىق. تەكسەرۋ جۇمىستارىن ازىرلەپ جاتىرمىز. ياعني، ول ۋنيۆەرسيتەتتىڭ رەكتورىنا سالەم ايتا الامىز. كۇتىڭىزدەر، اقپاراتتىق قاۋىپسىزدىك كوميتەتى تەكسەرۋ جۇرگىزىپ، دەرەكتەردىڭ قانداي جولمەن ۇرلانعان انىقتايدى. حابارلاما الماسۋ ماتەريالدارىنان اتالعان ج و و اكىمشىلەرىنىڭ ءبىرى دەرەكتەر ينفراقۇرىلىمىنىڭ كىلتىن ساتقانى كورىنىپ تۇر»، - دەدى ول.

كوميتەت اتالعان وقيعانىڭ ءمان-جايى ءالى زەرتتەپ جاتقان كورىنەدى.

«ياندەكس ەدا» قوسىمشاسىنا كەلسەك، ءبىر جىل بۇرىنعى وقيعانى قايتا ەسكە سالعان. وكىنىشكە قاراي، ءبىر جىلدىڭ ىشىندە ءبىر دە ءبىر قازاقستان ازاماتى دەرەگىنىڭ ۇرلانعانىن ايتىپ شاعىمدانعان جوق. قالعان دەرەكتەر بويىنشا تالداۋ جاسالىپ جاتىر. ول فورۋمداعى دەرەكتەردىڭ كولەمى وتە ۇلكەن. ءبىزدىڭ مىندەت - سول ۇرلانعان دەرەكتەردىڭ ىشىندە جەكە دەرەكتەردىڭ بار ەكەنىن انىقتاۋ. بۇل الەمدىك فورۋم بولعان. ونىڭ ىشىندە قازاقستاندىقتار، وزگە دە ازاماتتاردىڭ دەرەگى ءجۇر، سەنىڭىزدەر. سونىڭ ىشىنەن ناقتى قازاقستاندىقتاردىڭ دەرەگىن تابۋ كەرەك. سونىڭ نەگىزىندە دەرەكتىڭ قولدى بولۋىنا جول بەرگەندەر جازالانادى. ال دەرەگى ۇرلانعان ازاماتتاردىڭ كىم ەكەنى انىقتالسا، ەلەكتروندى ۇكىمەت ارقىلى ءارقايسىسىنا حابار جىبەرەمىز»، - دەدى رۋسلان ءابدىقالىقوۆ.

اۆتور
ەسىمجان ناقتىباي