ەرەكشە قاجەتتىلىكتەرى بار جاس وسپىرىمدەر ءتۇرلى ماماندىقتى يگەرىپ شىقتى

استانا. KAZINFORM - ەلوردادا «ەرەكشە ءبىلىم بەرۋ قاجەتتىلىكتەرى بار جاس وسپىرىمدەرگە ارنالعان وقۋ-وندىرىستىك كومبيناتى» پيلوتتىق جوباسىنىڭ تۇلەكتەرىنە كۋالىك بەرۋ ءراسىمى ءوتتى.

34 جاس ءوسپىرىم جەرگىلىكتى كوللەدجدەرىندە «اسپاز»، «كونديتەر»، «تىگىن ءىسى»، «ساندىك-قولدانبالى ونەر» ماماندىقتارى بويىنشا وقۋدى ءساتتى اياقتادى. جوبانى «بولاشاق» كورپوراتيۆتىك قورى «ءار بالا مەكتەپكە بارۋعا لايىقتى» باعدارلاماسى اياسىندا استانا قالاسى اكىمدىگىنىڭ جانە AMANAT پارتياسىنىڭ قولداۋىمەن جۇزەگە اسىرعانىن اتاپ وتكەن ءجون.

7-11-سىنىپ وقۋشىلارىنا ارنالعان پيلوتتىق جوبا قوعامدىق تاماقتاندىرۋ جانە سەرۆيس كوللەدجىندە، مەنەدجمەنت، بيزنەس جانە ءبىلىم كوللەدجىندە باستاۋ العان. جوباعا اۋتيزم، داۋن سيندرومى، اپەرت سيندرومى، ەپيلەپسيا، اقىل-وي دامۋى جەڭىل تەجەلگەن، تۋرەتت سيندرومى، پسيحيكالىق دامۋدىڭ كەشىگۋى جانە پسيحيكالىق-سويلەۋ دامۋىنىڭ كەشىگۋى بار 13-18 جاس ارالىعىنداعى جاس ءوسپىرىم قاتىسقان.

جوبانىڭ ماقساتى - ەرەكشە قاجەتتىلىكتەرى بار جاس وسپىرىمدەرگە الەۋمەتتىك بەيىمدەلۋگە، كاسىپتىك ءبىلىم الۋعا جانە جۇمىسقا ورنالاسۋعا كومەكتەسۋ. وقىتۋ 5 ايعا سوزىلعان. وسى ۋاقىت ىشىندە كاسىبي داعدىلاردى مەڭگەرىپ، ءتارتىپتى جانە تاۋەلسىز بولا باستاعان. كاسىبي وي- ءورىسى كەڭەيىپ قانا قويماي، بولاشاقتا جۇمىسقا ورنالاسۋعا دەگەن سەنىمدىلىكتى ارتتىرا تۇسكەن.

«بولاشاق» قورىنىڭ قامقورشىلىق كەڭەسىنىڭ ءتورايىمى دينارا گاپلاننىڭ ايتۋىنشا، پيلوتتىق جوبانىڭ ارقاسىندا مەكتەپكە دەيىنگى، مەكتەپ جانە ورتا ارناۋلى ءبىلىم بەرۋ ۇيىمدارىنداعى الاڭداردى قامتيتىن ۇزدىكسىز وقىتۋ جۇيەسىن قۇرۋعا مۇمكىندىك اشىلعان.

«استانا - بالاباقشالار مەن مەكتەپتەردە اۋتيزم بار جانە باسقا دا مەنتالدىق بۇزىلىستارى بار بالالارعا ارنايى الاڭ اشىلعان قازاقستانداعى جالعىز قالا. ەندىگى جەردە جەرگىلىكتى اكىمدىكتىڭ قولداۋىمەن ەرەكشە بالالاردىڭ كوللەدجدەرگە تۇسۋىنە جاعداي جاسالىپ وتىر. جوباعا قولداۋ كورسەتكەن قالا اكىمدىگىنە، AMANAT پارتياسىنا جانە الەۋمەتتىك كاسىپكەرلەر قاتارىنان سەرىكتەستەرىمىزگە زور العىس ايتامىن. ءبىزدىڭ تۇلەكتەر كاسىپورىنداردا ءوز پايداسىن تيگىزە الادى دەپ سەنەمىز، بۇل جوبا - ولاردىڭ قوعام ومىرىنە قوسىلۋىنىڭ ماڭىزدى كەزەڭى بولماق»، - دەدى دينارا گاپلان.

ەرەكشە بالانىڭ اناسى كسەنيا تسۋن بالاسىنىڭ «اسپاز» ماماندىعىن يگەرىپ شىققانىن ايتتى.

«مەنىڭ ۇلىم ءوز مەيرامحاناسىن اشۋدى ارماندايدى. بۇل جوبا ەرەكشە بالالاردىڭ قاجەتتى ماماندىقتى يگەرۋىنە ءارى ۇلكەن ومىردەن ءوز ورىندارىن تابۋىنا ءۇمىت سىيلايدى. جوبانى ۇيىمداستىرۋشىلارعا العىسىم شەكسىز»، - دەدى ول.

ايتا كەتەيىك، بيىل 9-سىنىپتى بىتىرگەن 4 ەرەكشە بالا كوللەدجگە وقۋعا قابىلدانعان.

ەستەرىڭىزگە سالساق، بۇعان دەيىن «بولاشاق» كورپوراتيۆتىك قورى قازاقستان فۋتبول فەدەراتسياسىنىڭ قولداۋىمەن ەرەكشە بالالارعا ارنالعان UNI Football League دەپ اتالاتىن بىرەگەي جوبانىڭ جۇزەگە اسىرعانىن جازعان ەدىك.