گرەك-ريم كۇرەسىنەن ازيا بىرىنشىلىگىنە قاتىساتىن بالۋاندار انىقتالدى

  استانا. KAZINFORM - يوردانيادا 22-30-ماۋسىم كۇندەرى كۇرەس تۇرلەرىنەن 17 جاسقا دەيىنگى سپورتشىلار اراسىندا ازيا بىرىنشىلىگى وتەدى.

اتالعان سىنعا قاتىساتىن گرەك-ريم كۇرەسىنەن قازاقستان كومانداسى انىقتالدى.

ولاردىڭ قاتارىندا نۇرداۋلەت قۇمار ۇلى (45 كەلى)، زاراپ سۇڭقار (48 كەلى)، ەدىگە تولەۋتايەۆ (51 كەلى)، الپامىس بولات ۇلى (55 كەلى)، ءشامىل دوسبول (60 كەلى)، دانيار قاناعاتبەك (65 كەلى)، ءابىلمانسۇر احالبەك (71 كەلى)، ەركەبۇلان اناپيا (80 كەلى)، ادىلەت تويشىبەك (92 كەلى) پەن ايدوس قايراتوۆ (110 كەلى) بار.

كوماندانىڭ اعا باپكەرى المات كەبىسپايەۆ.

ايتا كەتسەك، بيىل پاريج وليمپياداسىندا ەلىمىزدىڭ اتىنان گرەك-ريم كۇرەسىنەن ءتورت بالۋان سىنعا تۇسەدى.

بۇل تىزىمگە ايدوس سۇلتانعالي (60 كەلى)، دەمەۋ جادىرايەۆ (77 كەلى)، نۇرسۇلتان تۇرسىنوۆ (87 كەلى) جانە ءالىمحان سىزدىقوۆ (130 كەلى) ەنگىزىلگەن.