ەرجان ءبىرجانوۆ جەمقورلاردان تاركىلەنگەن قاراجات جيناقتالاتىن قورعا قاتىستى تۇسىنىك بەردى

استانا. KAZINFORM — قارجى ۆيتسە-ءمينيسترى ەرجان ءبىرجانوۆ قازىر جەمقورلاردان تاركىلەنگەن قاراجاتتى مەكتەپ قۇرىلىسى جوبالارىنا ارنايى كوميسسيا قاراستىرىپ جاتقانىن ايتتى.

— جالپى، 220 ميلليارد تەڭگە سومادا قاراجات ارنايى شوتقا (جەمقورلاردان تاركىلەنگەن قاراجات جيناقتالاتىن قور) ءتۇستى. قازىرگى كەزدە بۇل قاراجات ينفراقۇرىلىم جوبالارىنا باعىتتالىپ وتىر. ول جوبالار ءتيىستى كوميسسيادا قارالادى. اتاپ ايتقاندا، ءبىلىم بەرۋ نىساندارىنا قاتىستى قۇجاتتار جولدانىپ جاتىر، — دەدى ە. ءبىرجانوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

بىلتىر پرەمەر-ءمينيستردىڭ ورىنباسارى تامارا دۇيسەنوۆا جەمقورلىق قىلمىستار اياسىندا تاركىلەنىپ، قايتارىلعان قاراجات ەسەبىنەن 2023-جىلى 36 مەكتەپ سالىنسا، 2024-جىلى تاعى 25 مەكتەپ سالىنۋى ءتيىس ەكەنىن ايتتى.

ەسكە سالايىق، مەملەكەت باسشىسى 2022-جىلى 1-جەلتوقساندا جاريالاعان جولداۋىندا: «جەمقورلاردىڭ زاڭسىز تاپقان قارجىسى ولار سوتتالعان سوڭ مەملەكەتكە ءوتىپ، تۇگەلدەي مەكتەپ قۇرىلىسىنا جۇمسالۋعا ءتيىس»، — دەپ اتاپ وتكەن بولاتىن.