رەفەرەندۋمدا قانشا قازاقستاندىق داۋىس بەرەدى؟
استانا. KAZINFORM – ورتالىق رەفەرەندۋم كوميسسياسىنىڭ مۇشەسى ءسابيلا مۇستافينا بيىل 6-قازاندا ا ە س سالۋ ماسەلەسى بويىنشا وتەتىن رەفەرەندۋمدا قانشا قازاقستاندىق داۋىس بەرەتىنىن ايتتى.
«وبلىستاردىڭ، استانا، الماتى جانە شىمكەنت قالالارىنىڭ اكىمدىكتەرىنىڭ وكىلدەرى ۇسىنعان مالىمەتتەرى مەن ەسەپتەرىنە سايكەس، جەرگىلىكتى اتقارۋشى ورگاندار رەسپۋبليكا بويىنشا تىزىمگە 12 ميلليون 244 مىڭ 683 ازاماتتى ەنگىزدى»، - دەدى ءسابيلا مۇستافينا.
ول ناقتى قانشا بيۋللەتەن دايىندالاتىنىنا توقتالدى.
«رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ نورماسىمەن داۋىس بەرۋگە ارنالعان بيۋللەتەندەر ۋچاسكەدەگى سايلاۋشىلاردىڭ جالپى سانىنىڭ 1 پايىزى رەزەرۆىمەن ۋچاسكەلىك رەفەرەندۋم كوميسسيالارىنا جەتكىزىلەتىنى بەلگىلەنگەن. دەمەك، 12 ميلليون 367 مىڭ - 138 دانا داۋىس بەرۋگە ارنالعان بيۋللەتەن دايىندالۋى كەرەك.
«رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ نورماسىندا داۋىس بەرۋگە ارنالعان بيۋللەتەندەر ۋچاسكەلىك رەفەرەندۋم كوميسسيالارىندا داۋىس بەرۋگە 3 كۇن بۇرىن، كەمىندە 1 كۇن بۇرىن جەتكىزىلەتىنى بەلگىلەنگەن»، - دەدى ورتالىق رەفەرەندۋم كوميسسياسىنىڭ مۇشەسى.
ەسكە سالايىق، بۇعان دەيىن ورتالىق رەفەرەندۋم كوميسسياسىندا رەفەرەندۋم بيۋللەتەنى تانىستىرىلعان ەدى.
