ەردوعان: ءبىز قاقتىعىستى، كوز جاسى مەن قانتوگىستى كورگىمىز كەلمەيدى

Ердоған
Фото: Анадолы

 استانا. KAZINFORM - تۇرىك كوشباسشىسى تۇركيانىڭ تاۋەلسىز ونەركاسىپشىلەرى مەن كاسىپكەرلەرى قاۋىمداستىعىنىڭ (MـSIAD) ديرەكتورلار كەڭەسىنىڭ مۇشەلەرىمەن كەزدەسۋىندە تۇركيا مەن يزرايل اراسىنداعى ساۋدا كولەمى 9,5 ميلليارد دوللارعا جەتكەنىن اتاپ ءوتتى. ءبىراق وسىعان قاراماستان ەل «بۇل ەسىكتى تولىعىمەن جاۋىپ تاستاعان».

رەجەپ تايىپ ەردوعان يزرايلمەن ساۋدانى توقتاتۋ ماسەلەسىنە قاتىستى تۇركيا تەك ءيزرايلدى اقىلعا سالىپ، پالەستيناداعى اتىستى تولىق توقتاتۋعا قول جەتكىزۋگە تىرىساتىنىن ايتتى. ونىڭ ايتۋىنشا، تۇركيانىڭ بۇل ماسەلەدە ءبىر عانا ماقساتى بار - شەكتەن شىعىپ كەتكەن بينيامين نەتانياحۋ اكىمشىلىگىن پالەستيناداعى اتىستى توقتاتۋعا ماجبۇرلەۋ. بۇل رەتتە تۇرىك باسشىسى تۇركيا ۇكىمەتىنىڭ ءيزرايلدى سوعىستى توقتاتۋعا جانە پالەستيناعا گۋمانيتارلىق كومەك كولەمىن ارتتىرۋعا ماجبۇرلەۋ ءۇشىن ءبىرقاتار كوممەرتسيالىق شارا قابىلداعانىن باسا ايتتى.

«تۇركيا گازا سەكتورىنا گۋمانيتارلىق كومەك جونەلتۋدە الەمدە ءبىرىنشى ورىندا تۇر. بۇگىنگى تاڭدا پالەستينا حالقىنا 50 مىڭ تونناعا جۋىق جۇك جونەلتىلدى. ءبىز ءوز ايماعىمىزداعى بىردە- ءبىر ەلمەن جاۋلاسۋعا نەمەسە سوعىسۋعا ۇمتىلمايمىز. ءبىز جاي عانا گەوگرافيامىزدا قاقتىعىستاردى، قان مەن كوز جاسىن كورگىمىز كەلمەيدى»، - دەيدى رەجەپ تايىپ ەردوعان.

بۇعان دەيىن تۇركيانىڭ ساۋدا مينيسترلىگى يزرايلمەن ساۋدا-ەكونوميكالىق قارىم- قاتىناسىن توقتاتقانىن حابارلاعان بولاتىن. ۆەدومستۆو مەملەكەتتىك دەڭگەيدە قولعا الىنعان شارالاردىڭ ەكىنشى كەزەڭىن جۇزەگە اسىرۋ باستالعانىن حابارلادى. قازىرگى ۋاقىتتا بارلىق تاۋار بويىنشا يزرايلگە ەكسپورت-يمپورت وپەراتسيالارى توقتاتىلدى.

سوڭعى جاڭالىقتار