جاڭا شىققان «مەنىڭ التايىم» تەلەحيكاياسى شينجاڭنىڭ ساياحاتىن جانداندىردى - شەتەلدەگى قازاق باسپا ءسوزى
«KAZINFORM» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
«مەنىڭ التايىم» تەلەحيكاياسى شينجاڭنىڭ ساياحاتىن جانداندىردى - «حالىق گازەتى»
جاقىندا 8 سەريالى «مەنىڭ التايىم» تەلەحيكاياسى قىتايدىڭ ورتالىق تەلەارناسىنىڭ CCTV-1 ارناسىندا پرايم- تايمدا كورسەتىلىپ، قارالىم بويىنشا رەيتينگ كەزەڭىندە ءبىرىنشى ورىنعا شىقتى. بۇل تۋرالى وسى اپتادا قىتايلىق «حالىق گازەتى» باسىلىمى حابارلايدى.
اتالعان ب ا ق-تىڭ دەرەگىنشە، «مەنىڭ التايىم» 2010 -جىلى تانىمال جازۋشى لي جۋان باسىپ شىعارعان اتتاس ەسسەلەر جيناعىنان بەيىمدەلگەن. تەلەحيكايا التايدا شاعىن دۇكەن اشقان لي ۆەنسيۋ مەن ونىڭ وتباسىنىڭ جەرگىلىكتى قازاق مالشىلارىمەن بايلانىسى، قارىم- قاتىناسى باياندالادى.
بۇل مينيسەريال شينجاڭنىڭ التاي ايماعىندا تۇسىرىلگەن جانە ونداعى كوركەم پەيزاجدار تۋىندىنىڭ بىرەگەي بەلگىسىنە اينالعان.
«كينوداعى كوركەم تابيعات كورىنىستەرى، باي جانە قايتالانباس حالىق مادەنيەتى، قاراپايىم جانە مۇقيات ءومىر فيلوسوفياسى كوپتەگەن كورەرمەندى قىزىقتىردى، سونىمەن قاتار جەلى قولدانۋشىلارىنىڭ نازارىن التايعا اۋداردى»، - دەپ جازادى قىتايلىق ب ا ق.
سونداي-اق وسى اپتادا «حالىق گازەتى» باسىلىمىندا «قازاقستاندىق قويمادان 1000 توننادان استام جەمدىك بيداي ۇنى قىتايعا 15 كۇندە جەتتى» دەگەن تاقىرىپتاعى اقپارات جاريالاندى.
كەلتىرىلگەن دەرەكتەرگە سۇيەنسەك، 10-مامىردا قىتايدىڭ لۋجوۋ پورتىنىڭ حالىقارالىق كونتەينەرلىك تەرمينالىنا 62 كونتەينەر جۇك تيەلگەن قىتاي- ە و پويىزى كەلگەن.
بۇل پويىز قازاقستاننىڭ قوستاناي قالاسىنان اتتانىپ، شينجاڭنىڭ قورعاس شەكاراسىنان ەلگە كىرۋ ارقىلى لۋجوۋعا كەلدى. ساپار بارىسى 15 كۇنگە سوزىلعان. جۇك سالماعى 1612 توننا جەمدىك بيداي ۇنى. كەلەسى قادامدا جۇك لۋجوۋ ماڭىنداعى جەم وڭدەۋ زاۋىتتارىنا جىبەرىلمەك ەكەن.
وزبەكستاندا 10 جاڭا حالىقارالىق اۆتوبۋس باعىتى اشىلادى - «ءوز ا»
2024 -جىلى وزبەكستاندا 10 جاڭا حالىقارالىق اۆتوبۋس باعىتىن اشۋ جوسپارلانۋدا. كولىك مينيسترلىگىنىڭ حابارلاۋىنشا، بۇگىندە ۇلتتىق جانە شەتەلدىك 32 تاسىمالداۋشىمەن وزبەكستاننان 37 باعىت بويىنشا رەسەي، قازاقستان، قىرعىزستان جانە تاجىكستانعا جالپى 196 اۆتوبۋس قاتىناۋى جولعا قويىلعان. بۇل تۋرالى «ءوز ا» اقپارات اگەنتتىگى حابارلادى.
اتاپ ايتقاندا، كەلەسى 10 جاڭا حالىقارالىق اۆتوبۋس باعىتىندا بولماق، سامارقاند - بىشكەك، بۇحارا - بىشكەك، بۇحارا - استانا، سامارقاند - تۇركىستان،
بۇحارا - تۇركىستان، شاحريسابز - تۇركىستان، سامارقاند - دۋشانبە، بۇحارا - دۋشانبە، تاشكەنت - ۋفا، تاشكەنت - كراسنودار.
«2024 -جىلدىڭ قاڭتار- ءساۋىر ايلارىندا حالىقارالىق اۆتوبۋس باعىتتارىندا 173 مىڭ جولاۋشى تاسىمالداندى. كورسەتكىشتەر 2023 -جىلدىڭ سايكەس كەزەڭىمەن سالىستىرعاندا 15 پايىزعا وسكەن»، - دەپ جازدى وزبەكستاندىق ب ا ق.
قانداسىمىز ەرداۋلەت مەيرامبەك ۇلى ەل چەمپيونى اتاندى - Harajorga
9 بولىمنەن جانە 160-تان استام ويىننان تۇراتىن 6 كۇندىك تارتىستى باسەكەدەن كەيىن گۋاڭدۋڭ ولكەسىنىڭ شىنجىن قالاسىنداعى لونحۋا مادەني-سپورتتىق ورتالىق سپورت زالىندا 2024 -جىلعى ۇلتتىق بوكس چەمپيوناتى مامىردىڭ 14 ى كۇنى كەشكە ءساتتى اياقتالدى.
شينجاڭنىڭ بوكستان ەرلەر قۇراماسى 2024 -جىلعى بوكستان ەرلەر اراسىنداعى قىتايدىڭ ۇلتتىق چەمپيوناتىندا 1 التىن، 2 كۇمىس جانە 1 قولا مەدال جەڭىپ الىپ، بيىلعى ەل چەمپيوناتىنىڭ سەرياسىن ءساتتى اياقتادى، دەپ حابارلايدى قىتايلىق «Harajorga» باسىلىمى.
اتالعان باق- تىڭ دەرەگىنشە، شينجاڭدىق بوكس شەبەرى ەرداۋلەت مەيرامبەك ۇلى فينالدا 71 كەلى سالماق دارەجەسىندە حۋبەيلىك ليۋ ۆەيدى، شەنسيلىك ليۋ يۋحاودى جانە يۋننان ولكەسىنەن كەلگەن لي گۋوفەندى جەڭىپ، 71 كەلى سالماق بويىنشا چەمپيون اتاعىن جەڭىپ الدى.
جاس ويىنشىلار دا وتە جاقسى ونەر كورسەتكەن. 19 جاستاعى مۇستافا مۇحتار فينالدا جىجياڭنان، يۋنناننان جانە بەيجىڭنەن كەلگەن قارسىلاستارىن ارت-ارتىنان ويسىراتا جەڭىپ، ۇلتتىق چەمپيوناتتا 67 كەلى سالماقتا ەكىنشى ورىندى يەلەنگەن.
سونىمەن قاتار، 92+ كەلى سالماقتاعىلاردان ابدۋرشيت رامۋللا كۇمىس مەدال ەنشىلەسە، يزھار ءبىر قولا مەدالدى قاناعات تۇتقان.
ايتا كەتەيىك، 80 كەلى سالماقتا تانىمال بوكسشى توقتاربەك تاڭاتقان ۇلى قاتارلى مەملەكەتتىك كومانداداعى سپورتشىلار پاريج وليميادا سپورت جارىسىنا دايىندالعاندىعى سەبەپتى وسى جولعى جارىسقا قاتىسپادى.
سونىمەن قاتار وسى اپتادا «CNR» باسىلىمىندا «ول پاريج وليمپياداسىنا قاتىسۋ تولىمدىلىعىنا يە بولدى» دەگەن تاقىرىپتاعى اقپارات جاريالاندى.
ناقتىراق ايتساق، ىستانبۇل قالاسىندا وتكەن كۇرەس تۇرلەرىنەن پاريج وليمپياداسىنا الەمدىك ىرىكتەۋ تۋرنيرىندە قىتايدا تۇراتىن قانداسىمىز كابيران ابۋشايمان ۇلى پاريج وليمپياداسىنىڭ جولداماسىن جەڭىپ الدى.
قانداسىمىز ابۋشايمان ۇلى ىستانبۇلداعى الەمدىك ىرىكتەۋدە شيرەك فينالدان سۇرىنبەي ءوتىپ، جارتىلاي فينالدا قارسىلاسىنا جول بەردى. الايدا، قولا مەدال ءۇشىن تالاستا قارسىلاسىن ايقىن باسىمدىقپەن ۇتىپ، ۇزدىكتەر قاتارىنا كىردى. ال وليمپيادا جولداماسى ساراپقا سالىنعان شەشۋشى سىندا وزبەكستاندىق قارسىلاسىن 2:1 ەسەبىمەن ۇتىپ، پاريج وليمپياداسىنا جولدامانى جەڭىپ الدى.
ايتا كەتەيىك، 26 جاستاعى كابيران ابۋشايمان ۇلى قىتايداعى قازاقتار كوپ قونىستانعان تارباعاتاي ايماعى ءدوربلجىن اۋدانىندا قازاق وتباسىندا دۇنيەگە كەلگەن.
ول وسىعان دەيىن جازعى ازيا ويىندارىندا قولا مەدال جەڭىپ السا، ازيا چەمپيوناتىندا كۇمىس جۇلدەگە قول جەتكىزگەن. ەندى تۇركياداعى سوڭعى الەمدىك ىرىكتەۋ تۋرنيرىندە پاريج وليمپياداسىنىڭ جولداماسىن قانجىعاسىنا بايلادى.
شينحۋا اگەنتتىگىنىڭ حابارلاۋىنشا، قىتاي قۇراماسى كۇرەس تۇرلەرىنەن جالپى 11 جولداما جەڭىپ العان.
يران، وزبەكستان جانە قازاقستان تەننيس فەدەراتسيالارى اراسىنداعى ىنتىماقتاستىق تۋرالى مەموراندۋمعا قول قويىلدى - «Parstoday»
يران تەننيس فەدەراتسياسى باسشىسىنىڭ قازاقستانعا ساپارىنىڭ قورىتىندىسى بويىنشا يران، قازاقستان جانە وزبەكستان تەننيس فەدەراتسيالارى اراسىنداعى ىنتىماقتاستىق تۋرالى ەكى مەموراندۋمعا جەكە- جەكە قول قويىلدى.
بۇل تۋرالى اپتا سوڭىندا يراننىڭ «Parstoday» اقپارات اگەنتتىگى حابارلادى.
يراندىق اقپارات اگەنتتىگىنىڭ مالىمەتىنشە، ازيالىق تەننيستى دامىتۋ جونىندەگى كەڭەسشىلەر وتىرىسىنا قاتىسۋ ءۇشىن قازاقستانعا بارعان يران يسلام رەسپۋبليكاسى تەننيس فەدەراتسياسىنىڭ پرەزيدەنتى ازيزي قازاقستان جانە وزبەكستان تەننيس فەدەراتسيالارىنىڭ باسشىلارىمەن بولەك وتىرىستاردا كەزدەسىپ، ىنتىماقتاستىق تۋرالى مەموراندۋمعا قول قويدى.
«تالانتتى ىزدەۋگە نازار اۋدارۋ، الەمدىك جانە جاسوسپىرىمدەر جارىستارىندا قويىلمالى بەلگىلەردى شىعارۋ، جارىس كۇنتىزبەسى مەن ءۇش ەلدىڭ سپورتشىلارىنىڭ ءبىر- ءبىرىنىڭ جارىستارىنا قاتىسۋ مۇمكىندىگىن تۇزەتۋ، تورەشىلىك، جاتتىقتىرۋشىلار جانە ءبىلىم بەرۋ باعدارلامالارىن الماسۋ جانە ءارتۇرلى باعدارلامالاردى جۇزەگە اسىرۋ، تەننيستىڭ دامۋىنا باسا نازار اۋدارۋ وسى مەموراندۋمداردا ەسكەرىلگەن نارسەلەردىڭ قاتارىندا»، - دەپ جازادى يراندىق باسىلىم.
قازاقستانعا كەلگەن شەتەلدىك تۋريستەردىڭ سانى ارتتى - TRT
2023 -جىلى قازاقستانعا كەلگەن شەتەلدىك تۋريستەردىڭ سانى وتكەن جىلمەن سالىستىرعاندا ەكى ەسە ءوسىپ، 9,2 ميلليونعا جەتتى.
بۇل تۋرالى وسى اپتادا تۇركيا راديو تەليەۆيزيا پورتالى ق ر تۋريزم جانە سپورت ءمينيسترى ەرمەك مارجىقپايەۆتىڭ مالىمدەمەسىنە سىلتەمە جاساپ دەپ حابارلادى.
ايتا كەتەيىك، ق ر تۋريزم جانە سپورت ءمينيسترى ەرمەك مارجىقپايەۆ مينيسترلەر كەڭەسىنىڭ وتىرىسىندا ەلدەگى تۋريزم سالاسىنىڭ دامۋى تۋرالى مالىمدەمە جاساعان بولاتىن.
مارجىقپايەۆ 2023 -جىلعى مالىمەتتەر بويىنشا تۋريزم سالاسىنىڭ كوۆيد-19 ەپيدەمياسىنان كەيىن تەز قالپىنا كەلگەنىن ايتىپ، 2023 -جىلى قازاقستانعا 9,2 ميلليون شەتەلدىك كەلدى. بۇل سان 2022 -جىلمەن سالىستىرعاندا ەكى ەسە كوپ، دەگەن.
مارجىقپايەۆتىڭ ايتۋىنشا، ەلدە ىشكى تۋريست سانىنىڭ ايتارلىقتاي وسكەن. اتاپ ايتقاندا، وتكەن جىلى 9,6 ميلليوننان استام وتاندىق تۋريست ساياحاتقا شىققان.
سونداي-اق وسى اپتادا «TRT» - دا «تۇركيا ءماجىلىسىنىڭ باسشىسى مەن قازاقستان ەلشىسى كەزدەستى» دەگەن تاقىرىپتاعى اقپارات جارىق كورگەن بولاتىن.
اتالعان ب ا ق- تىڭ مالىمەتىنشە، تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋش قازاقستاننىڭ تۇركياداعى ەلشىسى ەركەبۇلان ساپييەۆتى قابىلدادى. قابىلداۋدا كۋرتۋلمۋش دوس جانە باۋىرلاس ەكى ەل اراسىندا ءار سالادا جاقسى قارىم-قاتىناستىڭ بار ەكەنىن جانە سوڭعى كەزدەگى ءوزارا ساپارلاردىڭ بۇل قارىم-قاتىناستارعا ۇلكەن ۇلەس قوسقانىن ءبىلدىردى.
سونداي-اق جاقىندا پارلامەنتتىك دەلەگاتسيامەن بىرگە قازاقستانعا رەسمي ساپارمەن باراتىنىن ايتقان كۋرتۋلمۋش قازاقستاننىڭ تۇركى الەمى ءۇشىن ماڭىزدىلىعىنا توقتالعان.
ايتا كەتەيىك، تۇركيا ۇلى ۇلتتىق ءماجىلىسىنىڭ ءتوراعاسى كۋرتۋلمۋش 2023 -جىلى 6-اقپاندا كاحرامانماراشتا بولعان جەر سىلكىنىستەرىنە بايلانىستى تۇركياعا كومەك كورسەتكەن قازاقستانعا العىس ايتقان.
اۆتور
بەيسەن سۇلتان ۇلى
