ەربولات دوسايەۆ: الماتىدا 2027 -جىلدان باستاپ كولىك قوزعالىسى شەكتەلۋى مۇمكىن
الماتى. KAZINFORM - بۇل تۋرالى الماتى اكىمى مەدەۋ اۋدانىنىڭ تۇرعىندارىمەن كەزدەسۋىندە حابارلادى.
كەزدەسۋ بارىسىندا ەربولات دوسايەۆتان الداعى ۋاقىتتا قالاداعى كولىك قوزعالىسى قانشالىقتى شەكتەلۋى مۇمكىن ەكەنى سۇرالدى.
- ءبىز ترانسپورتتىق بايلانىس پەن قوعامدىق كولىكتىڭ ساپاسىنا قاتىستى سۇراقتاردى شەشكەننەن كەيىن بۇل ماسەلەنى قاراستىرامىز. نيۋ- يوركتە كولىككە شەكتەۋلەر ەنگىزىلگەننەن كەيىن مانحەتتەندە كولىك ترافيگى ازايعانىن ءجيى ايتىلدى. ءبىراق نيۋ-يورك وعان كوپ جىل دايىندالدى. ءبىزدىڭ بولجام بويىنشا، 2026 -جىلدىڭ سوڭىنا قاراي كولىك جۇيەسىنىڭ قاڭقاسى قۇرىلسا، 2027 -جىلى ءبىز العاشقى شەكتەۋلەردى ەنگىزەمىز. ءبىراق شەكتەۋلەر تولەم ارقىلى بولادى. مىسالى، الماتىدا تىركەلگەن كولىك زاماناۋي تالاپتارعا ساي كەلمەسە، كەي ايماقتارعا كىرۋ ول ءۇشىن اقىلى بولادى. ەلەكترلى كولىكتەر نە زاماناۋي تالاپتارعا ساي كولىكتەر ءۇشىن بۇل تەگىن بولادى. بۇل جۇيەنى الدىمەن ازىرلەۋ كەرەك جانە بۇل باعىتتا ءبىز جۇمىس ىستەپ جاتىرمىز، - دەدى قالا اكىمى.
ەسكە سالايىق، بۇعان دەيىن پرەمەر- مينيستر ولجاس بەكتەنوۆ ءماجىلىس دەپۋتاتتارىنىڭ ساۋالىنا جولداعان جاۋاپتا الماتىنىڭ كەيبىر اۋداندارىندا كولىك قوزعالىسى شەكتەلۋى مۇمكىن ەكەنىن جازعان ەدى.
